Imphal, Lber:
Ha kane ka taiew kaba mynta, ka sorkar jong ka jylla Manipur ka la leit ban aiti sha ka National Investigation Agency (NIA) ban tohkit halor ka jingshah pynïap u khun jong u Myntri barim jong ka sorkar jylla.
Kat kum ki jingïoh lum khubor la ïathuh ba ïa ka metïap jong u Akoijam Nongnganba (40 snem ka rta) la ïoh ban tam da ki bor pulit ka thaiñ Kangpokpi na ka shnong Changoubung ha ka 11 tarik jong u bnai ba la dep (Rymphang, 2023).
Halor katei ka jingjia shah pynïap jong u Akoijam la ïathuh ba ki bor pulit ki la ïoh ruh ban kem ïa uwei u dkhot jong ka NSCN-IM bad ïa kawei ka samla ïa kiba la suba ba dei ma ki kiba la donkti ha katei ka kam pynïap briew.
Kat kum ki jingïoh lum khubor la ïathuh ba dei hadien ki jingïakhih bad jingdawa bapher bapher ba la pynlong da ki nongshong shnong ha kylleng ki bynta jong ka jylla ba na ka liang u Myntri Rangbah jong ka jylla – N Biren Singh u la pynbna ba la aiti ïa ka mokotduma sha ka NIA.
