Shillong, Lber 22:
U MLA ka Congress na Umsning konstitwensi, u Dr Celestine Lyngdoh u la buh jingkylli ha Ïingdorbar halor ka jingbud ryntih ka Sorkar haba ïadei bad ka jingrben ki surok kiba shna ha kane ka Jylla bad ïa ka por kaba dei ban maramot ïa ki surok kiba dang shu dep shna kynthup ki surok kiba shna lyngba ka Pradhan Mantri Gram Sadak Yojana.
Une u MLA ka Umsning u la wanrah ïa ka jingkylli ha Ïingdorbar Thawaiñ ha ka kynta kylli jingkylli ha ka Sngi Balang.
Haba jubab ïa ka jingkylli, na ka liang u Symbud Myntri Rangbah u Bah Prestone Tynsong uba peit ïa ka tnat shna surok, u la ong ba ka jingrben ka surok haba shna la ju bud katkum ka jingbatai kaba la buh da ka Indian Roads Congress (IRC).
U Bah Prestone u la ong ba ki surok PMGSY ruh ha nongkyndong ki hap bud ïa ki jingbatai katkum ka Rural Roads Manual, 2002 (SP-20) jong ka IRC. Haba ïadei bad ka por ban maramot ïa ki surok kiba la dep shna, u Bah Prestone u la ong ba ki surok kiba la dep shna hadien 4 lane 5 snem, la dei ban maramot ïa ki. Hynrei ka ju don man ka por ka jingmaramot ïa ki surok kiba la dep shna. U la ong ba ki jingpule bniah ïa ka jinglong ki jaka kam dei tang ha Meghalaya ne Rajasthan ban tip ïa ka jinglong ki jaka ban shna surok, hynrei ka dei kaba la leh ha baroh ki Jylla ha ka ri.
Ha kane ka kynta kylli jingkylli, u Dr Celestine u la buh jingkylli ruh ïa u Symbud Myntri Rangbah la ka Sorkar ka tip ne em. Balei ki surok kiba dang shu shna thymmai ki jot noh tang hadien katto katne por bad kaei ka jingkitkhlieh kaba ki kontraktor ki dei ban shim haba ki jot noh ki surok?
U la ai nuksa ruh ba ka long kaei kaei kaba diaw namar lada ïoh surok thymmai kaba 2 km, hynrei ka surok kaba la don lypa kumba 7 km pat, ka shah pynjulor pynban ha ki kali kiba kit tiar kit tar ban shna ïa kata ka surok thymmai kaba 2km. Kumta u Dr Celestine u la kylli, haduh katno ka jingkhia jong ki kali ka dei ban long, lada ki ïaid ha ki surok ha nongkyndong, ha ki surok kiba kham pdeng ka jingheh lane intermediate road, bad ki surokbah.
U Bah Prestone u la ong ba ki surok ki don la kajong kajong ka jinglah ban kyrshan ïa ka jingkhia ki kali kiba ïaid, hynrei ka Meghalaya ka dei ruh ka Jylla ba kham jur bha u slap ha kaba ki surok ruh ki kham julor kloi.
Hynrei u la ong ba ka Sorkar ka kwah ruh ban don ka jingmaramot ei ïa ki surok khlem da mang pisa thymmai.
