Imphal, Lber:
Ki bor sorkar jong ka jylla Manipur ha ka 22 tarik mynta u bnai ki la pyntip ba ha ki 36 kynta kiba la leit noh, ki bor pulit ka jylla ha ryngkat ka jingïatreilang bad ki Civil Social Organization ki la ïoh ban kem haduh 41 ngut ki nongkhaii bad nongdih droks na ki thaiñ bapher bapher jong ki 2 tylli ki distrik ka jylla.
Kat kum ka jingpyllait kyrwoh jong ka tnat pulit, la ïathuh ba hapoh ka jingïalam jong u Superintendent of Police, Imphal West District – S Ibomcha, ki pulit ka thaiñ Singjamei ki la ïoh ban kem ïa 6 ngut ki nongdih droks najan ka Little Rose school, Imphal ha ka miet jong ka Lah sngi U Blei ba la dep. Ïa kitei ki 6 ngut la ïoh ban kem hadien ka jingshah kem jong uwei u nongkhaïi droks u ba la tip kyrteng kum u Md Saruk Khan (23 snem ka rta) u ba la shan kem na ka shnong Kiyamgei, Imphal West district. Na kitei ki 6 ngut, ki bor pulit ki la ïoh ruh ban kurup ïa katto katne u droks.
Sa ha kawei pat ka jingleit khynra droks kaba la pynlong ha ka thaiñ Bishnupur District, na ka liang ki bor pulit jong ka jylla ha ryngkat ka jingïatreilang bad ka All Manipur United Clubs’ Organization (AMUCO) ki la ïoh ban kem ïa haduh 35 ngut ki nongdih droks na ka thaiñ North AOC, Imphal (27 ngut) bad na ka shnong Tronglaobi (8 ngut).
Hadien katei ka jingleit khynra droks, na ka liang ki bor pulit ki la ïathuh ba ïa ki nongkhaïi droks la kem bad pynngat hapoh ki kyndon jong ka Narcotic Drugs and Psychotropic Substances Act, katba ïa ki nongdih droks la leit ban ïalam noh sha ki ‘rehabilitation center’ kiba pher bapher na ka bynta ban pynbiang ïa ki lad jingïarap ïa ki.
