Shillong, Lber 22:
U Myntri Rangbah ka Jylla, u Conrad K Sangma, u la pyntip hapoh ka ïingdorbar thawaiñ ba ka bynta ba-ar (Phase-II) jong ka jingïakren pynbeit pud bad ka Assam na ka bynta ki hynriew tylli ki jaka ïakajia ba dang sah kan sa long ha u bnai ban wan.
U Conrad u la pyntip ïa kane haba jubab halor ka motion kaba la wanrah da u MLA ka Congress na Mawhati u Bah Charles Marngar ha ka Sngi Balang hapoh ka dorbar mang tyngka kaba dang ïaid shakhmat mynta halor ka jingdonkam ban ïakren ïa ka kylla ba ar jong ka jingïapynbeit pud bad ka jingdonkam ban shong bishar biang ïa ka MoU ba la ïasoi hapdeng ki ar ngut ki Myntri Rangbah jong ka Meghalaya bad Assam.
U Myntri Rangbah u la pyntip ba ka Sorkar ka la dep ban thaw bad pynthymmai biang ïa ki Regional Committee ki ban pyntyllun shakhmat ïa ka jingïakren pynbeit pud ha ka kylla ba-ar.
Ki hynriew tylli jaka khappud ba don ka jingïakajia ban rah bad ïakren ha kane ka kylla ba-ar ki kynthup ïa ka Khanduli bad Psiar, Block 1 bad Block 2, Borduar, Langpih, Nongwah-Mawtamur bad ka Desh Doomreah.
U Symbud Myntri Rangbah ka jylla, u Bah Prestone Tynsong, un khlieh ïa ka Regional Committee ka Ri-Bhoi bad ki dkhot ki kynthup ïa u Bah Sosthenus Sohtun MLA ka NPP na Jirang, Bah Mayralborn Syiem MLA ka UDP na Nongpoh, Bah Charles Marngar MLA Congress na Mawhati, Bah Jambor War Executive Member ka tnat Elaka ka Khasi Hills Autonomous District Council bad u Deputy Commissioner ka Ri-Bhoi kum u convenor.
Ka West Khasi Hills Regional Committee pat kan kynthup ïa u Bah Paul Lyngdoh, Myntri Sorkar Jylla kum u Chairperson, Bah Renikton Lyngdoh Tongkhar MLA ka UDP na Mawkyrwat, Bah Methodious Dkhar MLA ka HSPDP na Mawshynrut, Bah Gigur Myrthong Deputy Chief Executive Member (CEM) ka KHADC, Bah Bajop Pyngrope MDC ka Rambrai-Jyrngam kum ki dkhot bad u Deputy Commissioner ka West Khasi Hills kum u convenor.
Katba ïa ka West Jaiñtia Hills Regional Committee yn khlieh da u Symbud Myntri Rangbah, u Bah Sniawbhalang Dhar, katba u Myntri Sorkar Bah Comingone Ymbon, Bah Lahkmen Rymbui MLA ka UDP na Amlarem, Bah Nujorki Sungoh MLA ka UDP na Mowkaïaw, u CEM ka Jaiñtia Hills Autonomous District Council Bah Thombor Shiwat, u MDC ka JHADC u Bah Aiborlang Shadap kum ki dkhot bad u Deputy Commissioner ka West Jaiñtia Hills kum u convenor.
Shuh shuh u Conrad u la ong ba ha u ‘nai Ïaïong, yn sa sdang noh ïa ka wat ba nyngkong jong ka jingïakren ha ka kylla ba-ar. U la ong ruh ba ka Sorkar kan sa bthah ïa ki Regional Committee ba kin khot ïasyllok bad baroh ki kynhun ban dup sngewthuh shai ïa ki mat bad jingsngewkhia jong ki briew kiba shong ba sah ha ki jaka khappud.
Haba pynpaw ba kane ka kam, ka dei kaba buh sohkyrdot bha, u Conrad u la ong, “Kan nym long kaba suk ïa ngi ban wad ïa ka lynti pynbeit kaba pdiang da baroh, hynrei nga kyrpad ïa ki dkhot ka ïingdorbar ba ngin buh ïa ka jingpyrkhat jngai ha ka jingmut jingpyrkhat, lada ngi ïaid da ka jingpyrkhat ba ngim dei ban ai wat shi inshi ka jaka bad ym mynjur ïa kaei kaba kawei ka liang ka ong, ngi lah ban nym lah pynbeit ïa kane ka kam. Ngi dei ban ïaid da ka jingmut jingpyrkhat kaba shai bad ban ïeng beit halor ki jingdawa jong ngi ym ban ïapeiñ ïa ka bha ka miat ki paidbah”.
Haba kyrshan ïa kane ka motion, u MLA ka VPP na Nongkrem u Bah Ardent M Basaïawmoit u la sot ïa ka kyndon bad buh jingkylli halor ka Memorandum of Understanding (MoU) ba la ïasoi hapdeng u Myntri Rangbah ka Meghalaya bad u Myntri Rangbah ka Assam ba hato kan ïeng ne em hakhmat ka ïingbishar.
U Bah Ardent u la ong, baroh mynta ki ïeng ban ïaroh ba dei tang ka Sorkar MDA kaba nud ban shim rai bad pynbeit pud. Hynrei, kam long satia kumta, namar ym dei tang kane ka sorkar kaba sngewkhia ban pynbeit pud, ha ka jingshisha la lap ba wat ka sorkar ba la leit noh ruh ka la shim khia.
“Nga la long MLA naduh u snem 2008 haduh 2018 bad nga la lap ba ha ka por jong nga ruh, ka sorkar kaba don ka la shim khia, ka la khot ïa ka jingïalang jong baroh ki seng saiñ pyrthei bad bun ki lad ki lynti,” la ong u Bah Ardent bad bynrap “Ban kam ba dei tang ka Sorkar MDA kaba la leh ka kam ban pynbeit pud, nga sngew kam long kaba dei, dei ban ai burom ruh wat ïa ka sorkar kaba la leit.”
U la ong ruh ba ka dei ka kam kaba biang eh ïa ka Sorkar ba mynta ba kan shong bishar bad peit biang ïa ka MoU. “Ngam tharai ba ngin ailad ïa ka Sorkar ban shu pynlong kamkai ïa ngi. Kumno ngin ailad ïa palat 18 sq km ka jaka ba kan leit sha Assam. Ngi don ha ka liang ba duhnong bad kumba nga ong, kano-kano ka kam ba la leh kyrkieh kan kut ha ka jingbijai ei,” la ong u Bah Ardent.
Haba jubab, u Myntri Rangbah u la ong ba ka long kaba bakla ba u nongïalam ka VPP un ong ba ka Sorkar MDA ka la kam ba leh ïa kane kam khlem da ai burom lem ïa ki Sorkar ba la leit noh bad ka synñiang jong ki halor ka kam khappud.
U Conrad u la ong ba la bunbun sien, ka Sorkar ka ju pynlong ïa ka jingïalang bad ju ïasyllok, hynrei kam pat ju don ka sienjam ba la shim ban pynkut noh ïa ka jingïakajia khappud namar ka ju kut beit tang ha ka “ngin pynneh ïa ka status quo”.
“Kam dei ka kam kaba suk namar kane ka kam ka donkam ïa ka mon jong ka sorkar bad ka sorkar MDA ka don ïa kata ka mon bad kan rah ïa ka jingïakren sha kawei pat ka kyrdan,” u la ong.
U la ong ba haduh 32 tylli ki jingïalang ki la long hapdeng ki ar tylli ki Jylla naduh u snem 1971, bad 10 tylli napdeng kine la pynlong ha ka kyrdan jong ki Myntri Rangbah ha kine ki san snem kata naduh u 2018 haduh 2022. Kane ka la lam sha ka jingïasoi ïa ka MoU kaba la pynbeit ïa hynriew tylli ki jaka ba ïakajia hapdeng ki ar Jylla.
Nalor kane, u Myntri Rangbah u la pynpaw ruh ba ka Sorkar MDA ka shai kdar ba kan jam shakhmat bad ka MoU bad ong, “Ka dei u mawjam uba khraw bha” bad bynrap “Kane ka dei ka MoU ba la ïasoi ha ka kyrdan ba ha khlieh duh bad ha ka jingïadonlang u Myntri ka tnat Kam Pohïing ka Ri, namar kane ba ka sorjamin ka la ïaid shakhmat”.
