Guwahati, Lber:
U Myntri Rangbah jong ka jylla Assam, u Himanta Biswa Sarma ha kane ka taiew kaba mynta u la pyntip ha Ïing Dorbar Thaw Aiñ ba ka thaiñ khappud India – Bangladesh kaba don ha ka thaiñ Dhubri district ka dei ka thaiñ kaba kynrei tam ha ka liang ki kam sniew kam beaiñ, kynthup ïa ki kam khaïi tuh ïa ki masi. U la ïathuh ba na ka liang ki bor shipai ka BSF ki la shim ïa ki lad ki lynti kiba janai ban tehlakam bad rat dyngkhong ïa ki kam beaiñ ha katei ka thaiñ.
Ha ka jingai jingkren jong u Myntri Rangbah u la pyntip ba na ka daw jong ka jingkynrei ki kam beaiñ ha katei ka thaiñ, ki nongshong shnong ki la ïakynduh ruh ïa bun tylli ki jingheh na ka daw jong ka jingkhlaiñ ki kam pahara ka tnat shipai BSF. U la pyntip ba na ka liang ka Sorkar Jylla kan lah ban khmih halor kitei ki jingeh ynda ka la leit ban pynlong ïa ka jingïalang syllok bad ki heh sorkar ka BSF.
Haba ai jubab hadien ka jingshah kylli jingkylli ha u MLA ka AIUDF – Nazrul Hoque, na ka liang u Myntri Rangbah u la ïathuh ba katei ka thaiñ khappud ka dei ka thaiñ kaba jur bha ha ka liang ki kam khaïi beaiñ ïa ki masi bad kiwei kiwie ki mat; bad na ka liang ka tnat shipai ka hap ban shim ïa ki sienjam kiba jwat ban tehlakam ïa ki kam beaiñ.
Na ka liang u MLA ka AIUDF u la pan jingtip na u Myntri Rangbah ba balei ïa ki ïew kiba don ha ka thaiñ Dhubri district (kaba jngai tang kumba 2 km na ka khappud Bangladesh) la ju khang khyrdep da ki shipai BDF man la ka sngi ha ka por 5 baje janmiet; bad na ka liang u Myntri Rangbah u la pyntip ba ïa ka hukum kiba hapoh ka CrPC section 144 la pyntreikam hapoh 500 metres na ka khappud Indo-Bangla man la ka sngi naduh ka por 9 PM tad haduh ka por 5 AM. U la pyntip shuh shuh ba ki shipai BSF ki hap ban long kiba adkar ha kitei ki thaiñ khappud namar ba ki dei ki thaiñ kiba kynrei ki kam beaiñ. U la pyntip shuh shuh ba na ka liang ka sorkar kan sa leit ban ïakren bad ki bor pynïaid distrik bad kumjuh ruh ki heh sorkar ka BSF ban ïasyllok halor ki mat kiba ïadei bad ki jingtwad jingmut jong u MLA ka AIUDF.
Ha ka jingai jingkren jong u Myntri Rangbah, u la pyntip shuh shuh ba ha u snem 2021, ki bor pahara ki la ïoh ban pynrung ïa haduh 1181 tylli ki mokotduma ha ki distrik khappud, la ïoh ruh ban kurup ïa haduh 612 tylli ki kali bad ïoh ruh ban kem ïa haduh 1326 ngut ki runar. U la pyntip shuh shuh ba ki bor pahara ki la ïoh ruh ban kurup ïa haduh 13,000 tylli ki masi na ki thaiñ khappud bad ïoh ruh ban pynrung ïa 617 tylli ki mokotduma kiba ïadei bad ki kam khaïi beaiñ ïa ki masi.
