London, Lber:
Ha ka thup kyrdan ba thymmai ba lah pyllait da ka ICC ha kaba iadei bad ki rangkawang bol ha ka jingialehkai ODIs, ka khubor ba lah ioh lum ka iathuh ba uwei na ki nongkawang bol ba paw ka India u Mohammed Siraj u lah shah knieh noh na ka kyrdan ba 1 ha ka pyrthei kaba u lah bat katto katne ha u nongkawang bol ba pawnam ka Australia u Josh Hazlewood. Da kane ka jinglah u Hazlewood, ka la pynlong ia utei u rangialehkai ban kiew sha ka kyrdan ba nyngkong ha ka pyrthei bad u Siraj u la hiar noh sha ka kyrdan ba lai ha katei ka thup ba thymmai.
Shuh shuh ruh, sa uwei pat u nongkawang bol pace ka Australian u Mitchell Starc uba lah ialehkai bha ha ki ar jingiakhun ODIs ba nyngkong jong ki lai tylli ki jingiakhun ha India, u lah kiew kyrdan mynta na ka bynta ka jingpyniasohlang ialade bad u Siraj ha katei ka kyrdan ba thymmai. Kum ban shu pynpaw hangne ka long ba u Siraj uba lah wanphai sha ka kam ialehkai da ka jinglah jong u ban kamai ia ki 3/29 na ka bynta ban iarap ia ka kynhun ban rah ia ka jingjop ba nyngkong ha ka jingiakhun ODIs ba nyngkong bad ka Australia, u long uba lah kham tbit shuh shuh ha ka jingiakhun ODIs kaba ar da kaba pyllait ei ia ki 37 ron ha ki lai over bad uba lah duh noh syndon ia katei ka kyrdan ba nyngkong ha ka thup ki nongkawang bol. Kumjuh ruh utei u rangkawang bol uba lah shah tyllep noh ha u Mitchell Marsh bad Travis Head ha ka por jong ka jingiakhun ODIs kaba ar ha Visakhapatnam.
U Siraj, u long ruh u rangialehkai uba lah don ia ka jingseisoh ha ka jinglah ban kamai ron bha ha baroh shi lynter ka tei ka lympung iakhun ha ki jingiakhun ba lah dep, lah pynlong ia u ban khur ia ka tei ka kyrdan ba 1 ha ka pyrthei ha ka thup na ka lympung ialehkai ODIs dang ha u bnai K’lyngkot mynta u snem. Ha kaba iadei bad u Hazlewood uba lah khur noh shalade mynta ia ka tei ka kyrdan, ka long ba watla u long u rangialehkai uba lah duh ban shimbynta ha baroh kawei ka jingwan ban iakhun ODIs ka kynhun sha India kaba kynthup ia ki saw tylli ki jingialehkai Test bad lai tylli ki jingiakhun ODIs, u kylla long mynta uba nyngkong ha ka pyrthei ha katei ka thup kyrdan ba mynta ha ka sien kaba nyngkong eh ka jong u.
Shuh shuh ruh u Mohammad Shami uba lah wanrah sha ka kynhun ia ka jingiaid lynti jingjop ka kynhun ha ka jingiakhun ha Mumbai, u lah jam mynta da san jaka ban kynjoh sha ka kyrdan ba 28 bad u KL Rahul uba lah kamai ia ki 75 ron khlem shah pynrem ha ka jingiakhun ODIs bad ka Australia, u lah kiew mynta da lai jaka sha ka kyrdan ba 39.
Ha ka thup kyrdan jong ki nongtied ha katei ka lympung ialehkai, u nongtied ba pawkhmat ka India u Shubman Gill uba lah ialehkai bha ha ki jingiakhun bad u Virat Kohli; ki long ki nongialehkai kiba dang iaisah ha kajuh ka kyrdan ba ki lah bat baroh shi katta kata ka kyrdan ba 5 bad ba 7 katba u kapten ka kynhun u Rohit Sharma u lah kiew mynta da shi jaka sha ka kyrdan ba 9.
Kumjuh ruh u nongtied ka New Zealand u Kane Williamson u lah kiew sha ka kyrdan ba 2 napdeng ki nongtied ha ka jingialehkai Test hadein ka jinglah jong u ban pyniaid halade ia ka jingiakhun baroh kawei da ka kam tied bol ka jong u ha ka jingiakhun pyrshah bad ka Sri Lanka tad haduh ba ka kynhun kan da rah ia ka jingjop da 2-0. Da ki hynriew tylli ki jinglah ban kamai arsien ia ki spah ron ha ki jingialehkai Test, u Williamson mynta u don tang shi jaka hadien u Kohli (7) kum u rangialehkai ba lah ban kamai bun ron tam kata da palat 200 ron bad u nongtied ka Australia u Marnus Labuschagne u dang iaisah ha ka kyrdan ba 1 ha ka thup ki nongtied jong ka jingialehkai Test.
Kumta ruh u nongtied ka New Zealand u Henry Nicholls uba la lah ban kamai haduh 200 ron tam khlem shah pynhap wiket ha ka jing-iakhun Test ha Wellington, u lah kiew mynta da haduh arphew jaka sha ka kyrdan ba 27 bad u kapten jong ka kynhun Sri Lanka u Dimuth Karunaratne u lah ioh mynta ban khur shalade ia ka kyrdan ba 10.
