Jowai, Lber 22:
Ki pulit jong ka West Jaiñtia Hills ki la kem ïa u para jong u I Love You Talang ïa uba la tip kyrteng kum u Meban Talang ryngkat bad u paralok jong u, u Sambun Dkhar, halor ka jingkynnoh ba ki la donkti ban pynïap ïa uwei u samla ba dang 29 snem ka rta, u Pynkhreh Surong.
Ïa ka met ïap jong u Pynkhreh, uba dei na ka shnong Mynsngat, West Jaiñtia Hills, ki pulit ki la ïoh tam na kawei ka khlaw kaba don hajan ka surok-bah NH-06 kaba hap hapoh ka jingpeit jong ka thanat Mawryngkneng ha East Khasi Hills. Ïa kane ka jaka ba la lap ïa ka met jong u Pynkhreh la tip kum ka Pommura.
Ïa u Meban Talang, 21 snem rta, ki pulit ki la ïoh kem na Lad Demthring katba ïa u Sambun Dkhar, 27 snem ka rta, ki pulit ki la ïoh kem na Wahïajer.
Katkum ka khubor ba la ïoh na ki pulit, kine ki arngut ki la phla ba ki la donkti ban pynïap ïa u Pynkhreh bad ki la ïalam ïa ki pulit sha ka khlaw ba bret ïa ka met ïap jong u Pynkhreh. Ki pulit ki la shimti ïa ka met ban leh ïa ka ‘post mortem’ bad kiwei ki jingdonkam katkum ka aiñ.
Katkum ki dur ki dar kiba la saphriang la lap ba ïa ka met ïap la tap da ka jaiñ kymbor bad ban da u dieng.
Ka khubor kaba la ïohlum ka ïathuh ba u Pynkhreh u la jah rngai na la ïing naduh ka 11 tarik Lber, 2023 ryngkat bad ka kali Mahindra Pik-Up kaba dang shu thied thymmai. Ki bahaïing ki la ujor da ka ejahar ha thanat Nartiang halor kane ka jingjia.
Ki pulit ki la ong ba u para jong u Pynkhreh u la ai da ka jingthoh sha ki pulit ha ka 21 tarik Lber, 2023, ba une u samla u la jah rngai.
Na ka liang ki pulit ki la ong ba haduh mynta, kim pat lah satia ïa katei ka kali Mahindra Pik-Up.
Lah ban kdew ba u I Love You Talang ryngkat bad lai ngut kiwei pat ki la shah bom ïap ha ki paidbah ha ka thaiñ Shangpung ha u Nailur 2022 hadien ba ki la lait phet na patok kaba don ha Jowai.
