Shillong, Lber 22:
Ka aiñ-rew kaba la wanrah da u MLA ka North Shillong, u Bah Adelbert Nongrum, ka la shah kyntait noh ha Ïingdorbar Thawaiñ haba ïadei bad ka jingpyntreikam ïa ka State Reservation Policy haba jied ïa ki samla ka Jylla ban leit pule ha kino-kino ki jaka pule kiba la ai bhah na ka bynta ka Meghalaya.
Kane ka aiñ-rew la tip kum ka “Meghalaya Selection of Candidates for State Quota Seats to Higher Academic Courses, Bill, 2023”.
U Bah Adelbert hashwa ban wanrah ïa ka aiñ, u la kren lyngkot shwa da kaba pynpaw ba ka jingpyntreikam ïa ka State Reservation Policy ka dei na ka bynta ka bhah thungkam ha ki tnat treikam ka Sorkar. Nangta u la ong ba kaei ka ban jia lada ïa kane ka mat ruh yn don ka mukotduma ha Meghalaya High Court ban pyrshah ïa ka jingpyntrei kam ïa ka Reservation Policy ban ai bhah ha ki jaka pule kum ka jingleit pule doktor ne engineer namar kane ka kpait saiñ kam (policy) ka dei tang ban thungkam ha ki tnat treikam ka Sorkar.
Hadien ba la dep kren u Bah Adelbert, u Lamphang ka Ïingdorbar Thawaiñ u la shim ïa ka sur jong ki dkhot ka Ïingdorbar ban mynjur ïa katei ka aiñ.
Hynrei na ka liang u Bah Adelbert uba dei nongwan rah ïa katei ka aiñ rew lem bad ki kiwei ki MLA ka Liang Pyrshah, u khlem pynsawa ïa ka sur kaba kyrshan ne ong hooid (Aye) ïa katei ka aiñ-rew. Haba u Lamphang u la shim sa ïa ka sur kiba ong em, ka la sawa bha ka sur ki dkhot kiba ong em (No), kaba mut ba ka aiñ-rew ka la shah kyntait noh.
