Kolkata, Lber:
U nongïalam jong ka seng Trinamool Congress (TMC) u Anubrata Mondal, kham ha shwa u la shahkem ha ka kynhun Enforcement Directorate (ED) halor ka jingshah kynnoh ba u la don bynta ban khaïi beaiñ ïa ki masi, u la shah phah sha Tihar Jail na ka bynta ki 13 sngi.
“U la shah ïalam ha Rouse Avenue Court kaba don ha Delhi ha ka sngi Ba-ar naba ka jingset ïa u ha kti jong ka kynhun ED da 14 sngi ka la kut noh. Ka ïingbishar ka la bthah ba la dei ban set ïa u ha ka ïingbishar na ka bynta ki 13 sngi. Un sa shah set ha Tihar Jail,” la ong u muktiar.
Ka Rouse Avenue Court dang shen ka la buh jingkylli ïa ka kynhun ED ba balei ba ïa u Mondal ym shym lah ban wanrah hakhmat jong ka, wat lada ka la don ka shithi maham halor kane ïa kaba la wanrah ha u Nohprah jong u snem 2022.
U Mondal u la ong ba u don ha ka met ka bym koit bym khiah khnang ba un lait na ki jingshah rai pynrem kiba kham tyngeh. Hadien kane, ka Calcutta High Court ka la buh sharud ïa ka jingkyrpad ba la phah da u Mondal ha kaba u la pynibor halor ka shithi maham ba la phah da ka ïingbishar bakyrpang jong ka kynhun CBI, ha kaba kane ka la plie lad na ka bynta ka kynhun tohkit ba kan rah ïa u sha Delhi.
U la shah pynkynriah sha Delhi da ka kynhun ED ha basdang une u bnai.
“Naba u Mondal u la sngewthuh tang ïa ka ktien Bengali, ka ïingbishar ka la hukum ïa u Jail Superintendent ba un khmih bniah ha kaba ïadei bad ki jingpynbeit ryntih halor ki jingdonkam kiba ïadei bad ka patok khnang ban lah ban ïakren khlem kino kino ki jingeh. Ka ïingbishar kam shym ailad ïa u ban rah ïa kino kino ki pla hapoh patok lait noh ki dawai,” la ong u muktiar.
Kiwei pat kiba la shah kynnoh donkti ha kane kajuh ka kam bamsap kiba kynthup ïa u nongsynran barim jong u Mondal u Sehgal Hossain bad u Chartered Accountant u Manish Kothari, ki la shah set ha kajuh ka patok.
Ka kynhun CBI ka la kem ïa u Mondal ha ka 11 tarik, Nailar, 2022. U la shah pynpaw kyrteng ha ka jingmudui kaba saw jong ka kynhun CBI ïa kaba la buh da ka Asansol Court ha ka 7 tarik, Risaw.
U nongsynran barim jong u Mondal u Hossain, u la shahkem ha ka kynhun CBI ha ka 10 tarik, Jylliew jong u snem ba la lah bad u la shah kynnoh ba u la long u snar nongïalam ha ka jingjia ha ka kynhun tohkit ha ka jingmudui kaba lai ba la buh ha ka 8 tarik, Nailar.
Ki heh jong ka kynhun CBI ki la lap ba u Mondal u la don bynta halor ki 168 tylli ki jaka bad ki jingdon jingem kiba la paw pyrthei hapoh bad hadien u snem 2014. Ki la don kumba 12 tylli ki jingdon jingem kiba dei ki jong u, la suba ka kynhun tohkit, katba 144 tylli kiwei pat ki dei kiba don ha ki kyrteng jong ki bahaïing jong u, ki nongïarap bad ki briew ba don jingïadei bad u.
Kawei napdeng kine kiba la shah mudui donkti ka dei ka khun jong u Mondal ka Sukanya ïa kaba la shah tohkit ruh la lai sien ha ka kynhun ED ha ka jaka treikam kaba ha Delhi. Ka kynhun CBI ka la suba ba ki jingïoh jingmyntoi baroh ki la long na ka jingkhaïi beaiñ ïa ki masi ha kaba da kane la thied ïa kine ki jingdon jingem. Ka kynhun ED ka la tohkit bniah ha kaba ïadei bad ka jingdon jong ka jingkamai ïa ka spah bymhok.
