Shillong, Lber 22:
Wat la ka lympung ïalehkai U-14 Girls Inter District Cricket T20 Tournament 2023 ha ka sngi Balang ka la long kaba ïakhaid bha, hynrei ka la shah pynthut noh ha ki bor ka mariang.
Ka South Garo Hills District Cricket Association kaba la jop ïa kynting pisa, ka la shimti shuwa ban tied nyngkong pyrshah ïa ka West Khasi Hills DCA bad ïa kane ka jingïalehkai la pynhiar sha ki 12 over.
Haba wan kawang bol, ka WKH ka la lah ban pynkhyllem kloi ïa 2 wiket, hynrei ka Tempali Basumatary ka la lah ban ïalehkai bha bad khlem sha pynkhyllem na ka bynta ban tied 39 run na ki 33 bol. Nangta ka la lah ban kynjoh shaduh 54 run ha ka jingïatied lang bad ka Magdaline M. Sangma (13 not out).
Ka SGH ka la lah ban kynjoh sha ki 101 run bad shah pynkhyllem 3 wiket ha ki 11 over ha shwa ban pynsangeh ïa ka jingïalehkai.
Ki nongkawang bol ka WKH kiba la lah ban pynhap wiket ki long ka Evanrihun Sohshang (1/12), Idatyngkai Marngar (1/19) bad ka Adalyn Fedelia Lyngkhoi (1/30).
