Shillong, Lber 22:
Wat la ka Ri Bhoi District kam pat don ïa ki madan ïalehkai ba paka kumba long lem ha kiwei ki district jong ka Jylla, hynrei shen kan sa ïoh shwa da ka Athletic Track ha Chinchona kaba ha Nongpoh.
Ïa kane la pynpaw da u Myntri ka tnat ïalehkai u Bah Shakliar Warjri ha ka Sngi Balang ha ka Dorbar Mang Tyngka bad katei ka skhim kan wan lyngba na ka Khelo India.
Haba jubab ïa ka jingkylli ba la wanrah da u MLA ka Nongpoh Constituency u Bah Mayralborn Syiem halor ka jingbym don ka thaiñ Ri Bhoi ïa ka ‘standard stadium’ ka ban siang da u phlang plastik bad ka Synthetic Athletic Track, u Bah Shakliar u la ong, “La dep phah ïa ka jingtyrwa na ka bynta ka Athletic Track bad la khmih lynti ba shen yn sa ïoh ïa ka jingmang pisa.”
Kham hashwa utei u MLA ka Nongpoh u la pynpaw ba la dep phah ka jingtyrwa sha ka Sorkar Jylla naduh ki snem kiba leit. “Nga kwah ban tip na u Myntri ba dei khmih ïa ka tnat ïalehkai ne na u Myntri Rangbah la kane ka jingïai ap khmih lynti kaba la slem bha ban ïoh ïa ka Standard Stadium ha ryngkat ka jingsiang ïa u phlang plastik ha madan Pahamsyiem Nongpoh ka dang treikam ne em.”
Kumta u Bah Mayralborn u la kyntu ïa u Myntri Rangbah bad kumjuh na u Myntri ka tnat ïalehkai ba kin ïaleh katba lah ban pynkloi ïa ka jingmang pisa khnang ban lah ban pyntreikam bad kan long ka jingmyntoi ïa ki khynnah skul jong ka thaiñ. “Kumba ka Nongpoh ka dei ka nongbah jong ka district, kumta nga kyntu na u Myntri Rangbah bad kumjuh na u Myntri ka tnat ïalehkai ba kin pynkloi ïa katei ka jingmang pisa khnang ban lah pyntreikam noh ha ka por kaba biang.”
