Raphael Warjri
Lehse lah ban don mano re mano ha ka imlang sahlang ki ba iapher jingmut bad ym lah ban pdiang kum kata kaba la pashat jingmut shaphang ki rangbah bad samla kiba tbit ban kit ia ka lyngkor na ka bynta ban tehsong ia ki sengbhalang bad ki seng saiñpyrthei ha jylla Meghalaya. Hynrei baroh kaba la kdew ka long katkum ka sur paidbah ba la swar na byllai ki briew ki ba don kajuh ka mynsiem sngewkhia ia la ka jylla bad ia la ka jaitbynriew. Nalorkata bun na ki paidbah ne na ki kynran lyndem ki sngew thikna ba ka jingpyrshang ban tehsong ka long kaba donkam tyngeh, hynrei don kiba artatien ruh bad haba shim kyllum katto katne ki sngew ba ka jingkylla kan ym jia syndet bad kan shim ia ka por ka ia katkum ka pali. Baroh ki kubur ba kaba pynshai paidbah barabor ka long ka ba donkam khnang ba ki thab ki dab kin shon jingmut ha la janor bad shoh mynsiem ha la dohnud na ka bynta ka lawei jong ki pateng longdien ha jylla.
Haba swar jingmut na ki riew tymmen bad rangbah kiba la mad ia ka jinglong jingman ha ka imlang sahlang la kham jlan ka ryta, ki la buh artat kawei pat ka lad ban mihpli ha ka jaka ban tehsong ia ki sengbhalang ne ki seng saiñpyrthei,lada kumno re kumno lah ban tyngkhuh mawsiang. Shisien pyrkhat hi lah ban antad ba mar mar kumne te la tyngkhuh mawsiang shisha ban pyrshang tehsong ia ki seng-bhalang na ka daw ba ka iapait iapra ka la mih na kajuh ka tyllong kum ka kynhun ki samla ne samla rangbah. Ha ka ba iadei bad ki seng saiñpyrthei te ym lah ban long da lei lei ruh ha ka khep ba mynta, namar ba ki sengheh na dewbah India ki la ia phnieng markynti ka rukom pyrkhat shaphang ka imlang sahlang, kumjuh ruh ki seng riewlum ki don la ka jong ka jingiakhing para seng, kaba khleh artat bad ka khwan myntoi bad ka rhah bor rhah spah. Kumta kawei na ki jingpyrshang ka long ban thaw ki mat kyllum ki ba donkam ha ka imlang sahlang kiba lah ban kynthup lang ha kawei jingthmu ka ba lah ban mynjur ki para seng riewlum shwa, namar ba ia ki sengheh na dewbah India te ka shong ha ka iktiar na la ka khlieh-iingseng (headquarter) satlak ka Ri India.
Ha ba jurip sani ia ka mynsiem shitrhem jong ki samla bad rangbah ba ialam ha ka saiñpyrthei ha jylla lah ban kdew ba ym da don than kaei kaei ka ba pher lada nujor naduh ba ioh jylla rilum ba laitluid ha u snem 1972. Mynhakata ha ba ka Indira Gandhi, Myntri Rangbahduh ka Ri India ka dang thmu ban shu ai tang ka shnat-jylla khlem da suitñiew ia ka jylla ba pura katkum ba la dawa, lehse dei ka mynsiem shynrang jong u Bah Hoping Stone Lyngdoh kaba la kynteit ia ka sorkar kmie ban pyrkhat sani bad da shisha la ioh ka jylla ba pura ha ka 21 tarik Kyllalyngkot 1972. Hynrei ha kata ka por u Bah Hoping Stone Lyngdoh u la shah beh na ka seng APHLC bad seng da ka seng HSPDP namar ba ym iahap jingmut bad kiwei kiwei ki nongialam. Hadien kata pat la mih biang ka jingiapher jingmut ha ka seng APHLC bad u Bah G G Swell u ba la shah jied kum u MP sha Lok Sabha u la seng da ka seng PDIC ka ba la jah rngai noh shen namar ba ym don nongialam ki ba tbit bad iaineh ban pyniar ia ka seng. Ha ka snem 1978 haba la mih ka pait ka pra hapdeng ka APHLC, HSPDP bad PDIC haduh ba la kiew skong ka seng Congress, kumta la mih u Sohblei S Sngi Lyngdoh bad samla H S Shylla ban tehsong ia ki seng riewlum ban thaw ka sorkar lailama ka ba la neh tang shipor. Ha ka snem 1979 ter ter ha ba la wan hap shop ka saw ka sian ha ka imlang sahlang na ka daw ba tyllep ki mynder-ri la seng ia ka seng HNF ba la ialam da u Bah H S Shylla na ka daw ba shitrhem ia la ka jaitbynriew. Kine baroh lai tylli ki dei ki seng ki ba la pait bad mih hi na ki seng saiñpyrthei ha jylli paidbah bad baroh laingut ki nongialam ki don la ki daw ba shongnia ha la ka nongrim, katba ka seng ba ki la seng ka la nang swai lait noh tang ka seng HSPDP.
Hadien kata la ki sengbhalang ki la tuklar tyngeh halor ka jingdkoh ka sorkar jylla bad na ka seng FKJGP la seng ia ka seng saiñpyrthei PDM hapoh ka jingialam jong u samla Sounder Strong Cajee, na ka daw ba ki paradkhot ki sngewkhia ia la ka jaitbynriew. Hynrei tang shipor ka seng PDM ruh ka la jah rngai bad ki nongialam ki la ia khleh khawlang bad ka seng Congress. Hadien ba ka saw ka sian na ka ba tyllep ki mynder-ri ka la rasong bad ka synshar khadar ka la dkoh bad lymbiang ha ki ba bun ki liang, ka seng KSU ka la khie-im ban pyrta shla hapoh ka jingialam jong u Bah Paul Lyngdoh, namar ba ki paradkhot ki shitrhem bad sngewkhia ia la ka jaitbynriew. Kumta la seng ia ka KHNAM bad kane ruh ka khlem lah ban kyntiew ia la ka jing-thmu haduh ba u khliehduh da lade hi u la iasnoh bad ka seng UDP bad thmu pyndam syndon ia ka KHNAM. Hynrei ka KHNAM ka la khieim biang hapoh ka jing-ialam jong u Bah Pyndapbor Saiborne, hynrei tang shipor ka la mih biang ka jing-iaknieh long nongialam hapdeng u Bah Pyndapbor Saiborne bad Bah Adelbert Nongrum, tat haduh ba ka la jah rngai syndon mynta, bad u Bah Adelbert u la leit iasnoh bad ka seng VPP.
