Shillong, Lber 22:
Ka sorkar Meghalaya ha ka Sngi Balang ka la pynkynriah kam ïa ki katto katne ki pulit ha ka kyrdan Superintendent of Police (SP) ha ki distrik.
U Bah Sylvester Nongtnger, uba long mynta kum u SP ka tnat Fire & Emergency Services, u la wanphai biang kum u SP ka East Khasi Hills distrik hadien katto katne bnai ba u la shah pynkynriah kam. U Bah Nongtnger u la shah pynkynriah kam hashwa ban sdang ka ilekshon sha ka Ïingdorbar Thawaiñ ka jylla, bad mynta, un leit shimti ïa ka kam SP East Khasi Hills na u Dr. M.G Raghavendra Kumar.
U Dr. Kumar u la shah pynkynriah ban long kum u SP bathymmai ka tnat Criminal Investigation Department (CID) ha ka jaka jong u Dara Aswaghosh. Ïa u Aswaghosh la thung kum u SP (Traffic) ka East Khasi Hills.
Nalorkata, ka sorkar ka la wanrah biang ïa u Bah Vivek Syiem kum u SP (City) ha kane ka nongbah. U Bah Vivek u la shah pynkynriah kam kum u Assistant Inspector General (Law & Order) hashwa ka ilekshon bad mynta, u la shimti ïa ka kam SP (City) na u Ringrang TG Momin.
Ka sorkar ka la pynkynriah ïa u Ringrang ba un long kum u SP ka tnat Fire and Emergency Services ha Tura, West Garo Hills.
Shuh shuh ka sorkar ka la pynkynriah noh ïa u SP ka West Khasi Hills, u Darwin M Sangma, bad un leit shimti ha ka jaka jong u Bah Nongtnger kum u SP ka tnat Fire and Emergency Services. Ha ka jaka jong u Darwin, ka sorkar ka la thung ïa u SP ba mynta ka West Jaiñtia Hills, u Bikram D Marak. U Bah Chemphang Syrti, uba long mynta u Commandant ka 3rd MLP Battalion, un shimti kum u SP ka West Jaiñtia Hills na u Bikram.
Ki SP ka South Garo Hills bad East Garo Hills kin ïa bujli jaka ha kaba u Siddharth Kumar Ambedkar un long u SP bathymmai ka East Garo Hills ha Williamnagar katba u Abraham T Sangma un long u SP bathymmai ka South Garo Hills ha Baghmara.
