Miami, Lber:
Katkum ka khubor ba la ioh lum ka iathuh ba u khlur ialehkai Tennis ka ri Serbia u Novak Djokovic un nym ioh ban shimbynta ha ki jingialehkai ha ka lympung ka ban long ka Miami Open, namar utei u rang-ialehkai kat haduh mynta-mynne um pat shim ia ka tika iada na u COVID-19 na ka bynta ban ioh rung sha ka ri USA.
Kumta na ka liang u Director jong katei ka lympung ialehkai, u James Blake, u iathuh ba wat la u Novak u dang iai bat ia ka kyrdan ba nyngkong ha ka pyrthei bad uba long ruh u lahduh ha ka lympung haduh hynriew sien kynthih, u lah shah kyntait na ka bynta ban shah ia u ban rung sha katei ri wat hadien ka jingialeh kaba tyngeh da ki katto katne ki nongkitkam bahakhmat jong ka jingialehkai ban ailad ia u ban rung sha ka ri na ka bynta katei ka lympung ban long.
Shuh shuh kumba ka paw ruh ka long ba u Djokovic um shym la ioh jingbit satia na ka bynta ka jingioh jaka ka jong u ha ka lympung ialehkai kaba dang iaid shakhmat mynta haCalifornia Desert ka Masters 1000 event. Kumta, u Djokovic u lah duh noh ruh ia kiwei pat ki lympung ialehkai tang namar katei ka daw jong ka jingbym shym la treh ka jong u ban ai ia kata ka dawai iada na ka jingpang khlam, hynrei uba lah ioh jingbit pat na ka bynta ban shimbynta ha ka lympung iakhun Grand Slam ba nyngkong jong une u snem ba mynta ha Melbourne Park ka Australian Open bad uba lah rah syndon ia ka khet jingjop kaba 10 na ka bynta ka jingkhur ia ka Grand Slam ba 22 ha ka jingim ialehkai Tennis ka jong u.
Kumba ka paw mynta ka long ba ki bor pyniaid bahalor jong ka ri USA ki khmih lynti ha ka ban lah noh ban pynjem ia ka jingdonkam ban ai ia kata ka tika iada COVID-19 na ka bynta ban ioh rung sha ka ri ha u bnai Jymmang. Kane ka long ruh ka kabu ksiar bad ka jingailad ruh ia u Novak Djokovic ban ioh shimbynta bad ban ialehkai pat ha ka US Open. U Djokovic um shym la ioh shuh ban ialehkai ha Miami naduh ha ka ingshah pynwai noh ka jingiaid lynti ka jong u ha ka kylla iakhun kaba saw ha katei ka lympung ialehkai ha u snem 2019.
