New Delhi, Lber:
Kum ka jingpynkhreh ha kaba ïadei bad ka jingdon jong ka ilekshon Assembly ha Karnataka, u Myntri ka sorkar kmie uba dei khmih ïa ka tnat ki kam pohïing u Amit Shah u la thmu ban leit jngoh ïa ka jylla na ka bynta ban pynlong ïa ka jingïalang paidbah jong ka seng Bharatiya Janata Party.
Kane ka jingthmu jong ka seng ban pynlong ïa ka jingïalap paidbah ha kane ka jylla ka ban sa pynlong ïa ka ilekshon ka la pynlong ïa u Myntri ba un leit jngoh biang ïa ka jylla kum shi bynta ban pynkhlaiñ ïa ki rukom pyntreikam jong ka seng.
Kumba la ïathuh ka tyllong khubor, la ong ba u Shah un sa leit ban jngoh ïa ka Karnataka ar sien ha kine ki sngi ban sa wan. Ka jylla, ha kaba u Shah u la thmu ban leit jngoh la ong ba ka dei ka jingsdang jong ka jingplie lad na ka bynta ka seng BJP kan sa pynlong ïa ka ilekshon ha une u snem.
“Un sa leit ban jngoh ïa ka jylla ha ka 24 tarik bad ka 26 tarik, Lber, kane ka long hashwa ka jingleit jngoh jong u Myntri Rangbahduh u Narendra Modi ïa ka jylla,” la ong ka tyllong khubor.
Ha ka por jong ka jingleit jngoh, u Shah un sa leit ban pyllait piadbah ïa ki durmot, kiba kynthup ïa ka jong u Kempegowda (uba long u nongseng jong ka Bengaluru) bad u Basaveshwara (u nongwanrah ka jingkylla na ka bynta ki Lingayat), hakhmat jong ka Vidhana Soudha, ka State Assembly ha ka 24 tarik, Lber.
U Myntri Rangbah jong ka jylla u Basavaraj Bommai ha ka por ba u la don bynta ha kawei ka jingïalang ha Hubballi u la pyntikna da kaba ong ba u Shah un sa leit ban jngoh ïa ka jylla ka ban sa pynlong ïa ka ilekshon ha ka 24 bad ka 26 tarik, Lber katba u Myntri Rangbahduh un sa leit ban jngoh ha ka 25 tarik, Lber.
U Myntri Rangbahduh bad u Myntri ka tnat ki kam pohïing kin sa don bynta ha ka ban pynphuh pynphieng ïa ki prokram ki ban long ha kylleng ki jaka jong ka jylla.
Hadien ba la sawa ka khubor ban pynlong ïa ka ilekshon ha ka jylla ha kaba ka seng BJP mynta ka la bat ïa ka jingsynshar, ka seng BJP ka la pyrshang ban leit ïakynduh ïa kiba bun kynhun jaitbynriew bad buh ruh ïa ki durmot jong ki nongïalam kiba pawkhmat jong ka jylla.
