Bengaluru, Lber:
Ka sorkar Karnataka ka la buh ïa ka thong na ka bynta ban pynbiang um dih sha ki 4.64 lak tylli ki longïing kiba don ha Vijayapura distrik bad kumba ka long haduh mynta la lah ban pynïoh um sha ki 2.87 lak tylli ki longïing, la ong u Myntri Rangbah jong ka jylla u Basavaraj Bommai ha ka sngi Ba-ar.
Ha ka jingai jingkren ha ka por ba la don ka jingplie paidbah ïa ki jingpyntreikam halor ka jingthmu ban wanrah ïa ki kam pynroi bad ban sam ïa ki jingïoh jingmyntoi hapoh ka jingtreikam jong ki skhim ba bun ha Nalatwada, u Bommai u la ong ba hapoh ka jingtreikam jong ka Jal Jeevan Mission Scheme, ïa ki Pipe um la dep ban pynbiang sha ki 12 klur tylli ki longïing kiba don ha ka ri ha kaba 40 lak tylli ki ïing kiba don ha Karnataka ha kine ki lai snem ba la leit ki la shah pynbiang um.
Sa kiwei pat ki 25 lak tylli ki longïing kin sa ïoh ïa ka um dih lyngba ka jingphah um da ki Pipe ha u snem ban wan.
Hapoh ka jingtreikam jong ka Jaladhare Scheme, kumba T. 3,000 klur la dep ban pynbiang ha ka ban lah ban pynpoi um sha ki thaiñ sor.
Ka sorkar ka la don jingthmu na ka bynta ban pynbiang ka umdih ha kine ki sngi ban sa wan, la ong u Myntri Rangbah.
U la ong ba ha ka jinglut kaba T. 1,600 klur la dep ban plie ïa u mawnongrim na ka bynta ka jingtreikam jong kiba bun ki skhim. Ki la don kumba 9 tylli ki Irrigation Project kiba kynthup ïa ki Lift Irrigation Scheme jong ka Chimmalagi, Mulwad, Gutti Basavanna, bad Koppal la pynstet ha ka jingpyntreikam.
U Myntri Rangbah u la ong ba ka sorkar kaba mynta ka dei ka sorkar kaba ju ai ka jingkyrshan ïa ki nongrep bad ka la mang da kumba T. 16,000 klur na ka bynta ban ïarap ïa ki 54 lak ngut ki nongrep ha kaba T. 975 klur la dep ban sam sha ki nongrep kiba don ha ka thaiñ Mudhol. Kiba bun ki skhim na ka bynta ban kyntiew ïa ki nongrep, ki longkmie, ki samla bad ki kynhun trei bapher bapher la dep ban pyllait.
Ka sorkar ka la kular ban pyndep ïa baroh ki Irrigation Projects ha Mudhol.
U mawnongrim ba la dep ban plie paidbah na ka bynta ka Revanasiddeshwara Lift Irrigation Scheme la buh na ka bynta ban lah ban pyndonkam ha ka ban sam ïa ka um sha kylleng ki jaka.
La buh ïa ka Kittur Development Board na ka bynta ban lah ban kyntiew bad wanrah ïa ka roi ka par ha North Karnataka.
Ka sorkar kan sa pyllait ïa ka pisa sha ka Board na ka bynta ban lah ban pyndep ïa ki kam basah jong ki Irrigation Projects.
“Ngin ym shongthait katba ym pat lah ban pynbiang um sha ka jaka kaba heh kumba 5 lak Hectares ha baroh ki Assembly konstitwensi kiba don ha ka distrik,” la bynrap u Bommai.
