Shillong, Lber 23:
U Myntri Rangbah ka Jylla u Conrad K Sangma u la buh thong ban pyndep ïa baroh ki projek jingtei jaka ïalehkai kiba don ha ka jinglut T. 500 klur ha ki ar snem ban wan.
Ïa kane u la pynbna ha ka dorbar mang tyngka kaba la long ha ka sngi Palei. Kine projek ki kynthup ïa ka Indoor Stadium kaba thymmai bad ka jingmaramot pynbha ïa ka Jawaharlal Nehru Stadium ha Polo, ka P.A. Sangma Sports Complex bad ka Track & Field Stadium ha Tura, ka football stadium ha Wahïajer, West Jaiñtia Hills, ka Ampati Stadium, South West Garo Hills bad ka Adokgre Stadium ha North Garo Hills.
“Ka jingpynlut halor ki jaka ïalehkai ka long kaba kham kyrpang ha ki san snem mynshwa. Kumta ngin ïai bteng ban pynlut kumjuh ha kine ki san snem ki ban wan da ka jingkhmih lynti ban pynlong ïa ka Meghalaya kum ka jaka pdeng halor ki kam ïalehkai,” la ong u Conrad.
“Ha u snem 2023-24, ngin sdang ban tei ïa ka aquatic complex; ka pung jngi (Olympic sized), bad ki jaka ïalehkai tennis ha ka nongbah Shillong ha ka jinglut kaba T. 50 klur..”
“Ynda la lah ban pynurlong ïa kine baroh ki jaka ïalehkai, ka Meghalaya kan long ba la khreh ban pynlong ïa ki lympung ïalehkai jong ka ri bad ki lympung ïalehkai bar ri (international events) naduh u snem 2025,” la bynrap u Myntri Rangbah.
“Ha kine ki san snem ki ban wan, ngin pyntikna ïa ka jingdon ki jaka ïalehkai (indoor), ki madan ïalehkai (track & field), ki madan ïalehkai phutbol ki ban siang da u phlang ba shisha bad u phlang plastik ha baroh ki distrik bad kumjuh ha ki block. Ka jinglut halor kine baroh kan kot sha ka T. 1,000 klur. Ngin sa sdang noh ban pyntrei ïa ki jingtei bapher-bapher ha u snem 2023-24,” u la bynrap biang.
