Shillong, Lber 23:
Ka Meghalaya High Court ha ka Sngi Palei ka la pdiang ïa kawei ka mukotduma ba la ai da uwei u nongshong shnong ka Baghmara uba la kyntu ïa ka ïingbishar ba ka dei ban pynduh pyndam ïa ka jinglong MLA jong u Kartush R Marak uba mihkhmat ïa ka Baghmara konstitwensi.
Kane ka mukotduma kaba ïadei bad ka kam ilekshon la ai hapoh ka kyndon 80 bad 100 (1) (a) jong ka Representation of People Act, 1951, bad ka dei ka mukotduma kaba buh jingkylli halor ka jingshah jied jong u Kartush.
Hadien ba ka ïingbishar ka la sngap ïa u Sujit Dey, uba dei u muktiar jong u nongmudui, la rai ban phah shithi sha baroh kito kiba la shah mudui lang kynthup ïa utei u MLA ka Baghmara. Ka ïingbishar ka lah ban shong bishar biang halor kane ka mukotduma ha ka 14 tarik Ïaïong, 2023.
Lah ban kdew ba uwei u nongshong shnong ka Baghmara konstitwensi ha South Garo Hills ïa uba la tip kyrteng kum u John Marak, u la ai da ka mukotduma ha High Court ban phah mait kyrteng lane pynduh ïa ka jinglong MLA jong u Kartush.
Ka nongrim kaba u John Marak u la pyni ka long ba u Kartush u la pynpaw ha ki kot ki sla ilekshon ba u don 13 tylli ki kam kontrak bad ka sorkar jylla bad u dei ruh u kontraktor uba la pynrung kyrteng bad ki tnad treikam jong ka sorkar kum ka PWD Roads & Buildings, PMGSY, ka tnad pule puthi, Water Resource bad kiwei.
Kine baroh, ki la paw ha ka jingthoh lane ka ‘affidavit’ kaba u Kartush u la ai ha ka por ba u leit thep kyrteng ban ïakhun ïa ka ilekshon.
Lah ban kdew ba u Kartush uba dei u MLA khlem seng lane Independent, u la pynliem ïa u kyrtong ka BJP bad u MLA barim, u Samuel A. Sangma, ha ka ilekshon kaba dang shu dep.
U John Marak ha ka mukotduma u la pynpaw ba katkum ka kyndon 9 (a) jong ka Representation of People Act, 1951, uno-uno u lah ban shah mait kyrteng lada u dang don ki kam kontrak hapdeng jong u bad ka sorkar ban pyntrei ïa kino-kino ki kam.
U la ong ruh ba u Kartush u don bun tylli ki kam kontrak ba u pyntrei na ka bynta ka sorkar jylla, bad namar ba kine ki la paw ha ka sngi ba la peit bniah ïa ki kot ki sla jong ki kyrtong, ka sngi thep vote bad ka sngi ba pynbna ïa ka ‘result’ lane ka jingmih na ka ilekshon, namarkata, dei ban weng ïa u na ka jinglong MLA.
U John Marak u la ong ba kam don kano kano ka jingartatien ba ki kam kontrak jong u Kartush ki long na ka bynta ban pyntrei ïa ki jingtei, ban pynbiang ïa ki mar ki mata, na ka bynta ka sorkar jylla, bad namarkata, kine ki ktah ïa ka kyndon 9(a) jong ka Representation of People Act.
U nongmudui u la ong ba dei ban pyndam ïa ka jinglong MLA jong u Kartush katkum ka kyndon 100(1)(a) jong ka Representation of People Act namar ka jingshah jied kum u MLA ka long be-aiñ kumba la pynpaw ha ka Article 191(1) (e) jong ka Riti Synshar ka ri India bad ka kyndon 9(a) jong ka Representation of People Act.
Na ka liang u muktiar jong u John Marak, u Sujit Dey, u la ong ba ha ka Form 26 kaba dei kaba la pyndap ha ka por ba ïakhun ilekshon, la thoh ba u Kartush u la pyni ba ka tyllong jong ka jingïoh ka jong u lane ka ‘source of income’ ka dei na ka jingtrei ïa ki kam kontrak bad ka sorkar jylla. U la ong ruh ba u Kartush u la pyni ïa ki kam kiba u dang trei bad kiba u la dep trei kum u kontrakor.
U Dey u la ong ba ïa ka mukotduma dawa mait kyrteng ïa u Kartush kum u MLA la pynshong nongrim ha ka Article 191 (1) (e) jong ka Riti Synshar ka Ri India ha kaba kane ka kyndon ka batai ba uno-uno uba ïakhun ilekshon um lah satia ban don ki kam kontrak bad ka sorkar, bad lada u don kumta, u dei ban shah mait na ka jinglong MLA wat ynda u la dep ban shah jied.
Ha ka jingshisha, u la ong ba ha ka por ba peit bniah ïa ki kot ki sla jong ki kyrtong kiba ïakhun na Baghmara konstitwensi, u Returning Officer u la dei ban kyntait beit mardor ïa ki kot jong u Kartush namar u dang dei uba don ki kam kontrak bad ka sorkar. Kiwei pat kiba la shah mudui lang ha kane ka mukotduma ki long ka Election Commission of India bad u Returning Officer jong ka Baghmara konstitwensi.
Shuh shuh u la ïathuh ba ka nongrim jong katei ka mukotduma ka long kaba skhem namar ka la bud beit thik ïa ki kyndon jong ki aiñ kiba ïadei bad ka kam ilekshon bad ka jingmait kyrteng ïa ki MLA.
