Nongstoiñ, Lber 23:
Wat la ha ki bnai ba la leit, ka sorkar MDA-I lyngba u Myntri Rangbah u Conrad K Sangma ka la ïoh ban plie ïa ka ïing (building) kaba thymmai jong ka Sibsingh Memorial Government Higher Secondary School, hynrei haduh mynta ym pat shym lah satia ban pyndonkam ïa ka.
Da kane ka jingbym pat lah ban pyndonkam, ka la pynlong ïa ki khynnah jong katei ka skul ba kin dang hap ban bteng ka jingïoh jinghikai na ki kamra klas barim bad kiba la jot, bad kaba shah ruh na u slap bad ka lyer.
Ïa kane la lap ruh da ka Khasi Students’ Union (KSU) West Khasi Hills District ha ka jingleit jurip ha ka sngi Palei ha kaba katei ka ïing (building) kaba la dep shna pyndep, ka shu sah thylli bad khang tala khlem da lah ban pyndonkam.
U President ka KSU West Khasi Hills u samla John F Nongsiang u la ong, ka KSU hadien ka jingïoh ïa ka jingujor ka la leit ban jurip ïa ka skul bad ka la lap ba ki khynnah skul ki dang hap ban shong ha ki kamra jong ka ïing skul kaba khlem don ki ïit bad ki hap ban shah ïa u slap bad ka lyer.
Nangta u la ong ba ka seng ka la lap ruh ïa bun ki jingduna hapoh katei ïing skul bathymmai kaba dang sah thylli, kata naduh ki miej, ki shuki, ka bording, ka um bad khamtam eh ka madan jong ka skul ka dang long beit tang da ka khyndew bad ym shym pat siang da ka dewbilat ne da ka rong.
Shuh shuh ki nongïalam ka KSU ha ka jingïakynduh bad ïakren bad ki bor pynïaid jong katei ka skul, la sngewthuh ba ka jingbym pat lah jong ka skul ban pyndonkam ïa katei ïing thymmai ka dei namar ka jingbym pat aiti jong u kontraktor sha ki bor pynïaid ka skul.
Kumta ka KSU ka dawa na ka sorkar bad ïa ka tnat ba dei peit ba ki dei ban shim khia ban leh eiei noh mardor halor kane ka jingeh ba ka skul ka ïakynduh. Ka seng ka dawa ruh ban kynroh bha ïa katei ka skul bad ban pynbiang ruh ïa ka madan bad ïa kiwei ki jingdonkam kiba dang duna.
