Shillong, Lber 23:
U Symbud Myntri Rangbah ka jylla bad uba khmih ruh ïa ka tnat Kam Pohïing, u Bah Prestone Tynsong, u la kyrpad ïa ki nongshong shnong ka jylla ban ailad ïa ka aiñ ban leh ïa kaba donkam bad ruh ban kiar na kaba pynsaphriang ïa ki jingtip ki bym tikna khamtam ha ki rynsan ‘social media’.
U Bah Prestone u la pynpaw ïa kane haba jubab halor ka ‘zero hour notice’ ba la wanrah da u MLA ka VPP na Mawlai u Bah Brightstarwell Marbaniang ha ka sngi Palei ha ka dorbar mang tyngka halor ka lam-khlieh (heading) ba shah dung u samla Khasi ha Them Ïew Mawlong.
U Bah Prestone u la ong, “Ki la don bun ki khubor kiba la pynmih ha kaba ïadei bad kane ka jingjia, ki bym ïahap sur bad ka bad ka kaiphod jong ka tnat pulit, bad naba ka jingtohkit jong kane ka case ka dang ïaid shakhmat, ki jingshisha baroh halor kane ka jingjia, yn sa ailang sha baroh tad ynda ka jingtohkit kan lap ïa ka jingshisha baroh halor kane ka jingjia.”
“Nga shim ruh kane ka kabu ban kyrpad ïa ki nongshong shnong, ba ai ka aiñ kan leh ïa kaba donkam bad ba phin ïa kiar na ka jingpynphriang ki bym long kiba thikna khamtam ha ki rynsan social media,” la ong u Bah Prestone bad ai jingkular ruh ba ka tnat pulit ka dang leh ïa kaba donkam ban tih ïa ki jingshisha jong kane ka jingjia bad ban ai ka jingbishar ba hok ïa uba mynsaw.
U Symbud Myntri Rangbah u la ïathuh ruh ha Ïingdorbar ba u briew uba kynnoh ba u shah dung ha Them Ïew Mawlong um shym la ai ka jingbatai kaba shai, hynrei u la ai ïa ka jingbatai kaba ïapher naduh ka step 19 tarik Lber 2023 hadien ba ki pulit ki la pynlong ka jingtohkit halor kaei kaba jia.
U Bah Prestone u la ong ba hadien ba ki pulit ki la shim khia wut-wut ban wad jingtip bad pynlong ka jingtohkit halor ka jingjia ïa une u samla ba kynnoh shah dung uba la tip kyrteng u Zacharia Sohthiang uba shong ba sah ha Mawtary Myrdon, Umsning, ha kaba la lap ba ka jingjia ka jia ha ka por 3 baje mynstep ha ka 19 tarik Lber 2023 ha Khyndai Lad ha ki 3 ne 4 ngut ki runar bym lah ban ithuh.
U Bah Prestone u la ïathuh ba ha ka janmiet jong ka 21 tarik Lber, 2023 une u Zacharia u la ïathuh ha ki pulit ba u la shah dung hajan ka Hotel Pegasus ha Khyndai Lad ha kaba u la ithuh ruh ba ka dei ka kynthei kaba dung ïa u.
U Bah Prestone u la ong ba kane ka jingjia ka dei kaba ym shai na ka liang jong utei u briew uba kynnoh, u ai ka jingbatai kaba ym ïahap satia namar ka jingbatai ka pher na kawei pat ka jingbatai jong u.
Namarkata, u la ong ba kane ka kam mynta ka don hapoh ka jingtohkit bad na ka liang ki pulit ki dang trei shitom ban wad bad ithuh ïa kane ka kynthei ba la kynnoh ba ka dung ïa utei u briew.
