Kohima, Lber:
Ki bor sorkar jong ka jylla Nagaland ki la pyntip ba u YM Yollow Konyak, u Myntri barim jong ka Sorkar Jylla u la khlad noh ha ka 22 tarik mynta u bnai ha ka rta kaba 53 snem ka rta.
Halor katei ka jingjia, na ka liang u Symbud Myntri Rangbah jong ka jylla – Y Patton u la pynpaw ïa ka jingsngewsih bad phah ruh ïa ka khubor sngewlem sha ki bahaïing hasem jong u Yollow. U la ong ruh ba ki nongshong shnong jong ka jylla Nagaland kin ïai kynmaw don burom ïa ki kam khraw kiba u Yollow u la pyndep na ka bynta ka bha ka miat bad ka roi ka par jong ka jylla.
Kat kum ki jingïoh lum khubor la ïathuh ba u YM Yollow u la ïoh ban mihkhmat sha ka Ïing Dorbar Thaw Aiñ jong ka jylla Nagaland la ar sien ar wat. U la rung sha ki kam saiñ hima ha u snem 2013 da kaba ïakhun ïa ka ilekshon bad ïoh ruh ïa ka jingjop na ka thaiñ 42-Wakching Assembly Constituency kum u kyrtong shimet. U YM Yollow u la shah jied biang ban long u nongmihkhmat na katei kajuh hi ka thaiñ ha u snem 2018 da kaba ïakhun kum u kyrtong jong ka seng Naga People’s Front (NPF). Hadien ka jingthaw ïa ka sorkar ka bym don liang pyrshah ha u snem 2021, u YM Yollow u la ïoh ruh ban bat ïa ka shuki kum u Myntri jong ka Tnat Forest, Environment & Climate Change.
Dei ha u bnai Ïaïong, 2022 ba u Yallow lem bad 20 ngut kiwei pat ki MLA jong ka NPF ki la leit ban pynïasoh bad ka seng Nationalist Democratic Progressive Party (NDPP) hapoh ka jingïalam jong u Myntri Ramgbah Neiphiu Rio. Ha ka ilekshon Ïing Dorbar Thaw Aiñ kaba dang shu dep, na ka liang u Yollow um shym la don bynta ban ïakhun ïa ka ilekshon.
