Imphal, Lber:
U Myntri Rangbah jong ka jylla Manipur- N Biren Singh ha ka Sngi Balang mynta ka taiew u la ïawer ïa ki nongshong shnong jong ka jylla bad kin shim ïa ki lad ki lynti bad ki sienjam kiba kyrpang na ka bynta ban pynneh pynsah bad ïada ïa ki tyllong um kiba bsa umbam umdih na ka bynta ki nongshong shnong baroh jong ka jylla.
Ha ka jingai jingkren jong u Myntri Rangbah ha ka sngi ba la pynlong ïa ka prokram ban rakhe ïa ka “World Water Day” u la ong ba ka um ka dei ka jingim bad ym don uno uno u briew u ba lah ban im khlem ka um. Ha ka jingai jingkren jong u, u la kyntu ruh ïa ki nongshong shnong ka jylla ba kin sngewthuh bad tip ïa ka jingkordor jong ka um.
Ïa ka prokram ha katei ka sngi la pynlong ha Khuman Lampak, Imphal. U Myntri Rangbah u la ong shuh shuh ba ki dieng ki siej bad ki khlaw ki btap ki dei shi bynta na ka spah jong ka jylla kiba lah ban pynneh pynsah ïa ka um ha jylla.
U la kyntu ïa ki nongshong shnong ba ki dei ban pynneh pynsah bad ïada ïa ki khlaw ki btap bad kumjuh ruh ban pynlong ïa ki rynsan thung dieng ha ki bynta bapher bapher jong ka jylla.
Ha ka jingai jingkren jong u Myntri Rangbah u la pyntip shuh shuh shaphang ki sienjam kiba ka sorkar jylla ka la shim na ka bynta ban pynbiang ïa ka umbam umdih sha ki nongshnong shnong jong ka jylla. U la pyntip ba ka sorkar ka la dep ban pun ïa u pipe uba kyrpang na ka jaka pyllang um kaba don ha ka shnong Chingkheiching, bad ka la pynkhreh ruh ïa ki sienjam ban tan um na ka pung Loktak.
Ha ka jingai jingkren jong u Myntri Rangbah u la kyntu ruh ïa ki nongshong shnong ka jylla ba kin shim ïa ki lad ki lynti ban pynlang ïa ka um slap bad kumjuh ruh ban tip shai shaphang ki lad ki lynti kumno ban kunai ïa ka um.U la ïathuh ruh ba na ka liang ka sorkar jylla naduh ba la sdang ka samoi trei kam ka la shimkhia halor ki mat kiba ïadei bad ka rynsan “Green Mission Manipur”.
Ha ka jingai jingkren jong u Myntri Rangbah, u la pynpaw ruh ïa ka thong jong ka sorkar jylla ba kan pyndonkam da ki enjiniar bad ki nongtrei sorkar jong ka tnat Koit Khiah, ka tnat Sam Um, ka tnat Khlaw ba kin shim ïa ki sienjam ban pynlong ïa ki rynsan pynsgewthuh paidbah ha ki thaiñ rilum jong ka jylla halor ki mat kiba ïadei bad ka jingdonkam ban pynneh pynsah bad ïada ïa ki khlaw ki btap bad ki sieng ki siej.
