Delhi, Lber:
Ka Target Olympic Podium Scheme (TOPS) jong ka Kynhun Myntri ka tnad ialehkai ka ri mynta ka sien ka lah mynjur bad pdiang ruh ia ki jingkyrpad jong a rngut ki nongialympat ba pawkhmat ka ri, kata u Bajrang Punia bad Vinesh Phogat na ka bynta ka jing-leit hikai pyntbit bad kilan-met sha ri Kyrgyzstan bad Poland.
Kumta ha kaba iadei bad katei ka bynta, u Bajrang u lah buh ia ka jingkyrpad jong u hakhmat katei ka kynhun Myntri na ka bynta ba un leit hikai pyntbit sha Cholpon-Ata, Kyrgyzstan na ka bynta ki 16 sngi. Kumjuh ruh ka Vinesh ka lah buh ia ka jingtyrwa jong ka na ka bynta ka jingkwah jong katei ka nongialehkai ban leit hikai pyntbit shuh shuh ialade sha Spala; Poland haduh 11 sngi ha Olympic Preparation Centre. Kumta ka jingkyrshan sha kitei ki ar ngut da ka TOPS kan kynthup ruh naduh ka bai shong liengsuin jong ki nongialehkai, ki jingpynlut ha ka ktem ai jinghikai kaba kynthup naduh ka jinglut-jingsep ha ka kam ai jinghikai, jaka sah, ka bam-ka-dih bad kiwei pat ki jinglut jingsep kiba rit baria kum ka Airport Transfer, Insurance bad Internal Travel nalor kiwei pat ki jinglut-jingsep.
Ka TOPS ruh kan pynbit pynbiang ruh na ka bynta ki jinglut jingsep kiba bun jong ka paralok ka Vinesh ka Sangeeta Phogat bad ka Physiotherapist ka Ashwini Jeevan Patil bad u nongpyniaid jong u Bajrang u Sujeet Maan, Physiotherapist Aanand Kumar, bad Strength & Conditioning Expert Kaazi Kiron Mustafa Hasan. Katkum ka Selection Trials ba pynlong da ka Oversight Committee na ka bynta ki nongialehkai ialympat, ka National Coaching Camp kan sa long ruh na ka bynta ka kynhun ialehkai ka ri na ka bynta ka jingshimbynta ha ka lympung ialehkai ka ban wan ka Senior Asian Championship.
Ka National Camp kan sa long ruh ha Sports Authority of India’s (SAI) Sonipat Regional Centre bad ka ban sa don haduh 108 ngut ki nongialympat napdeng kiwei pat kiba lah shah jied lypa. Kumta kita ki 108 ngut kiba kynthup ia 36 ngut ki kynthei, 33 ngut ki ban iakhun ha ka Greco Roman bad 39 ngut ha ka Freestyle) yn sa kynthup ruh ia ki rangialympat ha ka Free-Style bad Greco roman kiba lah iai kilan-met mynta ha SAI Sonepat.
