Munich, Lber:
Ka khubor ba la ioh lum ka iathuh ba u khlur ialehkai phutbol ka Germany uba long ruh shi bynta u dkhot jong ka kynhun kaba lah rah ia ka trophy jingjop ha ka World Cup u Mesut Ozil, u la pynbna paidbah mynta ban shongthait noh na ka kam ialehkai. Kane ka wan hadien ba u la dep ban pyntyllun ia ka shalyntem ialehkai kaba baroh shi katta bad kaba la seisoh bad ka kynhun Germany, bad ka jingpynlut ruh ia ka por ialehkai ba tbit ha ka klob Real Madrid bad Arsenal.
Kum ban shu pynkynmaw biang hangne ka long ba u Ozil u la dep ban iarap ia ka ri Germany ban rah ia ka nam lahduh na ka WC 2014. Hynrei, ha kawei ka liang u la dap pat da ka jingktang mynsiem hadien ba katei ka ri ka la shah pynwai noh tang na ka jingiakhun ‘group stage’ ha ka World Cup 2018 ha Russia.
Ia u Ozil la kha bad uba la heh la san ha kawei na ki shnong ha Germany ka Gelsenkirchen.
Haba phai pat sha ka kam ialehkai na ki klob bapher bapher kiba u lah pyniasoh, u Ozil u lah paw bad seisoh bha ha kaba ka kam ialehkai ba tbit ka jong u ka lah iarap shibun ia ka jingmih noh na ka lympung ialehkai Bundesliga sha ka klob ialehkai jong u Jose Mourinho ha ka Spanish La Liga ka Real Madrid ha u snem 2010 bad uba la lah ruh ban btin lynti ia ka kynhun da kaba iarap ia ka ban khur ia ka trophy jingjop ba 32 na ka lympung ha u snem 2012.
Hynrei ka song pisa kaba bun ia kaba lah tyrwa hakhmat jong u ha ka iew iadie-iathied da ka Arsenal, ka lah pynlong ia u ban rung noh sha ka tei ka klob ha u snem 201 bad uba lah iarap ruh ia ka kynhun ialehkai na London ban pynkut noh ia ka jingbym shym la lah shuh ka jong ka ban rah ia ka thong jingjop na ka FA Cup ha u snem babud.
Ha u snem 2014, u Ozil u lah sdang ia ka jingialehkai ba khatduh ha kaba ka Germany ka la lah ban pynliem noh ia ka kynhun ialehkai u Lionel Messi ka Argentina da 1-0 kol ha ka jingiakhun phainal ha ka WC jong utei u snem ha Maracana; Rio de Janeiro. U long ruh u rangialehkai uba lah shah jied bunsien na ka bynta ban iaknieh ia ka khusnam Ballon d’Or.
U Ozil u lah pynkut noh ia ka kam ialehkai Shabar-ri ka jong u na ka kynhun ialehkai ka Germany ha shuwa ba un leit ban pyniasoh bad ka Fenerbahce bad kaba dangshen eh mynta ka long ka jingpyniasoh bad ka klob ialehkai na Istanbul ka Basaksehir.
