Nagpur, Lber:
Ki pulit jong ka Nagpur ki la pynkhlaiñ ïa ka jingpahara ha ka jaka sah jong u Myntri ka sorkar kmie u Nitin Gadkari bad kumjuh ha ka jaka treikam jong u hadien ba la ïohpdiang ïa kiba bun ki jingshah byrngem lyngba ka phone.
Kumba la ïathuh ki heh pulit, la ong ba uwei u briew u la phone kumba lai sien ha kaba ïadei bad ka jingbyrngem byrsit ïa u Myntri ka sorkar kmie lada jia ba um siew ïa ka pisa kaba 10 klur sha u.
Une u briew uba la phone u la pynithuh ïalade da ka kyrteng kum u Jayesh Pujari, ba la tip ruh da ka kyrteng kum u Jayesh Kantha, une u dei ujuh u briew ha kaba ïa ka kyrteng la pyndonkam kumjuh na ka bynta ban phah ïa ki khubor byrngem ha ka jaka treikam jong u Myntri, la ïathuh u heh pulit.
Kum ka jingsam shuh shuh ïa ki jingtip kiba bniah, u Rahul Madane, uba long u Deputy Commissioner of Police (zone II), u la ong ba lai tylli ki Phone Call, ha kaba ar tylli ki la long ha ka por mynstep bad kawei pat ka la long ha ka por shiteng sngi, ki dei kiba la phone sha ka jaka treikam jong u Gadkari, kaba don mar pyrshah bad ka Orange City Hospital ha Nagpur.
Une u briew uba la phone u la dawa T. 10 klur bad byrngem ban thombor pyrshah ïa u Myntri sorkar lada jia ba um siew ïa katei ka pisa ba la dawa, la ïathuh ki pulit.
Hadien ba la ïoh jingtip halor kane ka jingjia, ki pulit jong ka Nagpur ki la sdang ban pynlong ïa ka jingtohkit, la ïathuh shuh shuh u heh pulit.
