Bengaluru, Lber:
Ki pulit jong ka Bengaluru ki la pyntroiñ ïa ka kynhun jong ki runar kiba ju knieh ïa ki Phone jong ki nongïaid nongïeng ha ka por ba ki kren Phone haba ki ïaid lynti ha ka por janmiet bad ïoh ruh ban kurup ïa 109 tylli ki Mobile Phone kiba la kot sha ka T. 40 lak na ki, la ïathuh ki heh pulit.
Ki la don kumba lai ngut ki briew kiba la shahkem bad buh ïa 11 tylli ki jingmudui, la bynrap ki pulit.
Kane ka jingshah pyntroiñ jong kane ka kynhun ki runar ka la long hadien ba ki pulit ki la pynlong ïa ka jingtohkit ha kaba ïadei bad ki jingjia jong ki jingshah tuh jong ki Phone ha u Naiwieng jong u snem ba la lah.
Ha ka 21 tarik, Naiwieng, u Aziz Gogna, uba long u nongshong shnong jong ka Koramangala, u la buh da ka jingujor ha ka jaka treikam jong ki pulit ka Vivek Nagar ha kaba la ong ba ka Mobile Phone jong u ka la shah knieh noh katba u dang ïaid ha ka surok.
Ka la shimpor da kumba lai bnai bad da ki kynta na ka bynta ban khmih bniah na ki Footage na palat 300 tylli ki CCTV Camera khnang ban ïohkem ïa kiba la shah kynnoh.
Ha ka sngi Ba-ar, ki pulit jong ka Vivek Nagar ki la ithuh ïa ki briew kiba la shahkem ha kaba ki la ïathuh ba ïa kine la tip kyrteng kum u Ejaj Pasha (19), Suhail (20) bad u Mohmed Saqlain (23), kine baroh ki dei ki nongshong shnong jong ka Goripalya kaba don ha Bengaluru.
U heh pulit u la ong ba kine kiba la shah kynnoh ki la trei ha ka kynhun bad ki la ju thombor pyrshah ïa ki nongshong shnong jong kine ki thaiñ bad kumjuh ïa ki trai jong ki iPhone.
Kine kiba la shah kynnoh ki la tuh ruh ïa ka Pulsar Bike ïa kaba la pyndonkam ha ka ban leit tuh ïa ki phone, la ïathuh u heh pulit ha kaba u la bynrap shuh shuh da kaba ong ba kine ki runar ki ju treikam bha ha ki thaiñ kum ha Koramangala, HSR Layout, Ashok Nagar, Wilson Garden bad kiwei pat ki jaka.
Kumba la ïathuh ki pulit, la ong ba arngut na kine kiba la shah kynnoh ki ju shong ha ka kali ar shaka, knieh ïa ki phone bad hadien kane ki ju ai sha uwei pat uba dei u para dkhot ïa uba la ap ha ka jaka ba la ïakut lypa.
Ïa kine ki phone la ju die duna dor noh ne loit lyngkhot lyngkhai ïa ki ha kaba la die pat ïa ki tiar pyndonkam.
Haba la khmih bniah ïa ka jingmudui jong u Gogna, ki pulit ki la khmih bniah ïa ki CCTV Footage bad lap ba ka kali ar shaka ha kaba la pyndonkam na ka bynta ki kam tuh ka dei kaba la ieh ha Goripalya Circle.
Na katei ka jaka, kine ki runar ki la jah noh ha kaba ym lap dien shano ba ki leit. Ki pulit ki la ïai bteng ban buddien bad ban khmih bniah ïa ka jingwanphai jong kitei ki runar.
Ha kaba ïadei bad ka jingpyntreikam, ïa ki pulit la pyntriekam na ka bynta ban khmih bniah ïa kane ka kali ar shaka ha ka janmiet jong ka lah sngi U Blei, ha kaba u Pasha bad u Suhail ki la leit ban shim ïa katei ka kali arshaka ki la ieh, ki pulit ki la buddien bad ïohkem noh ïa ki. Hadien kane, u Saqlain u la shahkem lang. Ki pulit ki la pynlong ïa ka jingtohkit kaba bniah ïa kine kiba la shahkem.
U Deputy Commissioner of Police (Central) u Srinivas Gowda u la ong ba ki la lah ban buh jingmudui da 11 tylli halor ka jingjia bad ïoh ruh ban kurup ïa 113 tylli ki Mobile Phones (kynthup ïa ki Phone jong kine kiba la shah kynnoh) kiba la kot sha ka T. 40.80 lak.
Kumba la ïathuh ki pulit la ong ba ïa kine ki Mobile ba la tuh la ju rah ïa ki sha ka ïew ha ka sngi u Blei ha Hyderabad.
“Ki la don shibun ki kynhun jong ki runar kiba la treikam ha Bengaluru ha kaba kiba la shah kynnoh ki ju ïoh mynsiem na ka bynta ban leh ïa ki kam tuh jong ki bad kumjuh ruh ki ju ïoh nong,” la ïathuh u heh pulit.
