New Delhi, Lber:
Ka Ïing Kashari ba kyrpang jong ka National Investigating Agency (NIA) kaba don ha ka nongbah Guwahati ha ka sngi Balang mynta ka taiew ka la tian bishar bad rai pynrem da ka jingshah set patok ka ban neh shirta pyrshah ïa u Rabi Basumatary (dkhot seng kieng atiar Bodo) na ka daw jong ka jingdonkti jong u ha kawei ka kam thombor pyrshah ïa ki nongshong shnong jong ka thaiñ Balapra, Kokrajhar District, Assam ha u snem 2014 – kaba la wanrah ruh ïa ka jingïap jong 7 ngut ki ‘riew paidbah.
Na ka liang ka Ïing Kashari ka la pynbna ïa katei ka rai hadien ka jingkhmih bad jingbishar bniah ïa ki 2 tylli ki mokotduma kiba u Basumatry u la donkti. Ka Ïing Kashari ka la rai pynrem ruh da ka jingshah set patok kaba 10 snem na ka daw jong ka jingdonkti jong u ha kiwei kiwei ki mokotduma kiba la pynrung bad pynngat hapoh ki kyndon jong ka Indian Penal Code bad jong ka Unlawful Activities (Prevention) Act.
Kat kum ki jingïoh lum khubor la ïathuh ba ha ka 1 tarik u Jymmang, 2014, u Rabi Basumatry lem bad 6 ngut kiwei pat ki dkhot jong ka seng kieng atiar National Democratic Front of Boroland (NDFB) ki la leit ban rung sha ka shnong Balapara, Kokrajhar District – ka shnong kaba hap hapoh ka jingkhmih jong ki bor pulit ka Gossaigaon PS bad ha katei ka jingleit ka jong ki, ki la siat pathar ïa ki nongshong shnong jong katei ka thaiñ hadien ka jingïoh ïa ka hukum na u nongïalam jong ka NDFB – G Bidai bad Songbijit. Ha katei ka jingjia, ki la don 7 ngut ki nongshong shnong kiba la kyllon ïap bad 2 ngut kiwei pat kiba la ïoh ïa ki jingmynsaw kiba jur.
Hadien katei ka jingjia la ïathuh ba u Basumatary u la shah kem noh ha u bnai Nailur, 2016 bad na ka liang ka NIA ka la pynrung ïa ka ‘chargesheet’ pyrshah ïa u ha u bnai Ler, 2017.
Ïa ka ‘chargesheet’ kaba nyngkong la pynrung pyrshah ïa u Pradip Barman ha Gossaigaon (Balapra) ha u Nailar, 2015. Katba ïa ka ‘chargesheet’ kaba ar la pynrung ha u bnai Risaw, 2019 pyrshah ïa u Upen Basumatary bad ïa ka ‘chargesheet’ kaba lai pat la pynrung ha u bnai Kyllalyngkot, 2021 pyrshah ïa 5 ngut kiwei pat ki dkhot jong ka seng NDFB.
Dei ha u Naitung jong u snem 2016 ba ka Ïing Kashari ka la tian bishar bad rai pynrem da ka jingshah set patok shi rta jingim pyrshah ïa u Pradeip Barman.
