Shillong, Lber 23:
Ka Ryntih Sports & Cultural Club, kaba dei kawei na ki klob phutbol kaba la paw ha ka Jylla, ha ka 22 tarik ka la ïohpdiang da ki tiar kilanmet bad ki tiar ïalehkai phutbol na ka Directorate jong ka Assam Rifles kaba la noh synñiang lyngba ka scheme CAP.
Kane ka scheme ka dei ba na ka liang katei ka tnat treikam jong ki shipai ka ju ïarap khnang ban wanrah ka jingïajan bad ki paidbah ha ka imlang sahlang.
Kum ban shu pynkynmaw, u Bah Teiborlang Pathaw MDC Mawlai, naduh ki por mynshwa u pynpaw ba nalor ki jingmyntoi ba wan na ka sorkar kmie bad sorkar jylla, ki don ruh ki lad ba lah ban ïoh na ki shipai bad na kiwei de. Kumta haba pynurlong ïa kane ka jingïoh ïa ki tiar kilan met bad tiar ïalehkai phutbol kaba kot sha ka T.1 lak, sha ka Ryntih Sports & Cultural Club kaba don ka Head Quarter ha Mawlai Mawdatbaki, Shillong, na ka liang ka Club ki la dap da ka jingkmen bad ka jingsngewnguh kaba khraw. Namar ki tiar kiba la ïoh ki long kiba donkam ha kaba ai jinghikai ïa ki rangïalehkai bad kumta ka la long ka jingmyntoi kaba khraw haduh katta ïa ka klob.
Ha ka jingïalang ba wan aiti ïa kitei ki tiar, la sakhi lang ha ka jingïadon ryngkat u Bah Teiborlang Pathaw (MDC) EM ka KHADC, kum u Kongsan, u Bah P. T. Passah, ADM kum u Symbud kongsan, kiba la shah khot kyrpang ki long na ki shipai Assam Riffles u Dy. Commandant Shri A. K. Lakhera bad u Khushwinder Singh. La synran ruh na ka liang ka shnong Mawdatbaki da u Bah B. R. Kharmujai, Rangbah Shnong, Bah L. S. Lyngdoh, General Secretary, ki dkhot ka Seng Samla Mawlai Mawdatbaki, ki longkmie ha ryngkat ki rangialehkai ka Ryntih S C.
