Shillong, Lber 23:
U nongïalam ka Congress u Jairam Ramesh uba dei ruh u dkhot ka ïingdorbar Rajya Sabha, u la thoh sha u Director jong ka Central Bureau of Investigation (CBI) ban bthah ba kan buh jingkylli bad tohkit ïa u Myntri ka tnat Kam Pohïing ka Ri, u Amit Shah, uba la kynnoh ba ka Sorkar MDA-I ha Meghalaya ka dei kaba bamsap tam hapoh ka Ri.
Ha ka shithi ba la phah sha u Director ka CBI u Subodh Jaiswal ha ka 21 tarik u Lber, 2023, u Ramesh u la ong ba u Amit Shah ha ka jingïalang paidbah ha ka 17 tarik Rymphang, 2023, u la ong ba ka sorkar barim ba lamkhmat da u Conrad ka dei ka sorkar kaba bamsap tam hapoh ka Ri.
Katkum kane ka shithi, une u nongïalam ka Congress u la ong ba u Myntri ka tnat Kam Pohïing ka Ri u la ïoh lypa ïa ki jingtip kiba bniah bad ki jingshisha kiba sa pynlong ïa u ban kynnoh kumtei haneng.
Shuh shuh ka shithi ka la ong, “Imat namar ki daw bym lah ban pyrkhat, ba u Myntri ka tnat Kam Pohïing ka Ri um shym la lah ban leh eiei halor ki jingtip ba la ïoh ba ïadei bad ka kam bamsap jong ka sorkar barim.”
Une u nongïalam ka Congress u la kyntu ïa u Director ka CBI ban khor hajir ïa u Amit Shah bad ban bthah ïa u ba un aiti ïa baroh ki jingtip bad ki jingshisha kiba la pynlong ïa u ban ai da katei ka dak.
U Ramesh u la kyntu ruh ïa ka CBI ban tohkit lada u Myntri ka tnat Kam Pohïing ka Ri u la don hapdeng ka jingshah pynbor na ka seng jong u, ka BJP ne na kiwei pat ki bor, “Ban pynjah ïa ki jingtip kiba ïadei bad ka jingkynnoh bamsap ïa ka Meghalaya, khnang ban pynlah ïa ka BJP ban kyrshan ïa ujuh u Myntri Rangbah hadien ka ilekshon.”
