Shillong, Lber 23:
U MLA ka Congress na Mawhati, u Bah Charles Marngar, u la kyntu ïa u Myntri Rangbah ka Jylla, u Conrad K Sangma, ba u dei ban tuklar halor ka jingleh donbor jong ka Sorkar Assam, kata ban khang ïa ki kam pynroi kiba la pyntrei ha ki shnong ba don ha khappud.
U Bah Charles u la kyntu ïa ka Sorkar halor kane, ha ka por ba u la wanrah jingkylli ha ka kynta kylli jingkylli ha ka sngi Palei hapoh ka ïingdorbar.
Une u MLA ka Mawhati u la kyrpad ïa u Myntri Rangbah ban tuklar ïa kane ka kam bad ban pynsangeh ïa ka jingleh donbor ka Sorkar Assam na ka bynta ka jinglah ban pyntrei khlem jingpynthut ïa ki kam pynroi ki ban ai jingmyntoi ïa ki paidbah ba sah ha khappud.
U Bah Charles u la kynnoh ba bun ki kam pynroi bala pyntrei da ka Sorkar Meghalaya ki la shah khang ha ka Sorkar Assam bad ai nuksa ïa saw tylli ki projek ba kynthup ïa ka jingtei ïa ka ïing building ICDS ha Madan Umwang, ka skul SSA Lower Primary (kaba la shah pynpra), ka skhim JJM ha Jatalong bad ka ïingdorbar Shnong ha shnong Umru. Ym tang ba u la ai nuksa hynrei na ka liang une u MLA, u la sei ruh da ki dur ban pyni hapoh ïingdorbar kum ki jingpynshisha.
Haba jubab ïa kane, u Conrad u la ong ba ka dei ka jingshisha ba katto katne ki projek ki la shah pynsangeh, hynrei kam dei pat kaba la jia ïa bun tylli ki projek.
U la pyntip ba ka jingpyntrei ïa ki spah tylli ki projek ki la ïaid shakhmat mynta.
Haba kubur ba ym dei ban pynsangeh ïa kano kano ka kam pynroi, u Conrad u la ong, “Kane ka dei ka daw balei ba ngi la ïai bteng ban buddien bad ka Assam haba mih ki jingujor ba shah khang ki kam ba pyntrei. Tang mar syn ïoh jingtip, ki Deputy Commissioner bad ki ophisar ba dei khmih, mar mar kila ïakren bad kila pyrshang ban pynbeit ïa kine ki kam kham kloi kat kaba lah”.
U Myntri Rangbah u la ong ruh ba ka jingshah khang jong ki jingpyntrei ïa ki kam pynroi ka ju jia na baroh ar liang, ym tang ka Assam, hynrei wat ki kam pynroi ba pyntrei da ka Assam ruh ki la shah khang ha ki paidbah kiba dei na Meghalaya.
“Kane ka dei ka daw balei ba ar ngut ki Myntri Rangbah ki la ong ba watla ngi lah ban don kano kano ka jingïapher jingmut, ki kam pynroi kim dei ban shah pynsangeh. Namarkata, 99 persen na kine ki kam ki la ïaid beit ïaid ryntih, hynrei ki don katto katne ki kam kiba hap ban ïakren,” u la ong.
U Myntri Rangbah u la kular ban tuklar ïa kum kine ki jingjia bad ong, “Nga kyrpad ïa ki dkhot ban phah ïa ki jingtip. Ngi long kiba suk ban ïashem ne ïakrem bad ngi angnud shisha ban pynthikna ba kum kine ki jingeh ki dei kiba hap ban pynbeit. Lada don kino kino ki jingeh, ngin tuklar mardor. Ki Dkhot ki lah ban ai da ka jingthoh bad ngin sa ïakren mardor bad ka Sorkar Assam”.
