Shillong, Lber 23:
Ka Myntri ka tnat ka Koit ka Khiah ka jylla, ka Kong Ampareen M Lyngdoh, ka la ïathuh ba ka jiingkhlad jong i khunlung hapoh ka jaka sumar ha Ganesh Das Hospital ka dei naduh ka por ba i dang don hapoh ka kpoh jong ka kmie.
Hadien ka jingsaphriang ki khubor ba kawei ka longkmie ka la kynnoh ba ka la duhnoh ïa la i khun ba ka la pun kumba 7 bnai eiei namar ka jingtreikam kaba suki bad ka jingbym peit bniah jong ki nongsumar kiba don hapoh katei ka jaka ai jingsumar. Na ka liang ka Myntri ka la leit mar mar sha katei ka jaka sumar ban leit ïakynduh ïa ki doktor bad ïa katei ka longkmie kaba dei na ki thaiñ Mawlasnai ban tip kham bniah ïa ka daw tynrai.
Haba kren sha ki lad pathai khubor hadien ka jingwan jngoh ka Myntri ha ka sngi Palei, ka Kong Ampareen ka la ïathuh ba katei ka jingkynnoh ka dei kaba bakla namar itei i khunlung i ba don hapoh kpoh jong ka kmie, i la dep ban khlad lypa hashwa ba kan wan phah sumar ha katei ka jaka sumar.
Ka la ong ba katei ka longkmie ka la ïathuh ba ka la dep ban tip lypa ba i khunlung ba don hapoh kpoh jong ka, i la dep ban khlad lypa naduh ka por ba ka la leit ban shim dawai ha ka jaka ai jingsumar shimet bad hadien kane kin sa rah noh ïa ka sha Ganesh Das Hospital, Shillong.
Ka Kong Ampareen ka la ong ba ïa katei ka bynta kan sa wad bniah ba naei katei ka jingpynbna kaba bakla ka la mih bad kum ka Myntri kaba dei peit ïa ka koit ka khiah kan shimkhia khamtam ïa ki longkmie kiba armet.
Nalorkata, ka la ong ruh ba na ka liang ki nongsumar jong katei ka jaka ai jingsumar, ki la ong ba ka khlem shym la don kano kano ka jingbym shimkhia ne ka jingleh torti, hynrei ki la phah ïa katei ka longkmie ba kan wan sha katei ka jaka ai jingsumar ba kan ïoh ïa ka jingsumar na ka jingkhlad noh i khunlung bad ban ïoh pyndep ïa ki kamram kumba la bthah.
Shuh shuh ka Kong Ampareen ka la ong ba ha ka jingleit jurip ïa ka Ganesh Das Hospital Shillong, ka la bthah ïa ki nongkhmih ïa ka jaka ai jingsumar ban pynthikna ba ki longkmie ne mano mano ruh kiba wan shim dawai ne phah sumar ha katei ka jaka sumar ki dei ban ïoh lut ïa ki jingsumar kiba tista bad ha ka rukom kaba janai bad kaba paka.
“Kum ka longkmie ba dei peit ïa ka koit ka khiah ngan trei shitom ban kitkhlieh lem na ka bynta ki para longkmie kiba dang kha dang pun ïa ki khun ki kti jong ki ba ngin ai ïa ka jingsumar ka jingpeit kaba biang bad ba bit tam,” la ong ka Kong Ampareen.
