Shillong, Lber 24:
U MLA ka Voice of the People Party (VPP) na Nongkrem, Bah Ardent Miller Basaïawmoit u la ong ba ka jingthmu jong u Lamphang, u Thomas A. Sangma ban pynsangeh kynsan ïa ka ïingdorbar ha ka Sngi Thohdieng ka long ban kiar na ka jingïatai halor ka mat ‘Roster System’.
“Kane ka jingthmu ka long tang ban kiar na ka mat kaba donkam tam halor ka ‘Roster System’,” la ong u Bah Basaïawmoit haba kren sha ki lad pathai khubor hadien ka jingpynsangeh noh jong u Lamphang ïa ka ïingdorbar ha ka por 12 baje mynsngi.
Katkum ka jingsngewthuh jong u, u la ong ba ka Sorkar ka tip shai ba ka don ka mat kaba donkam bha ba la aiti da u dkhot ka liang pyrshah ha kaba la kdew ruh ba ka long kaba donkam kyrkieh ban ïakren bad ban kyrpad na ka Sorkar ban pynsangeh noh ïa ka jingpyntreikam ïa ka ‘Roster System’ hapoh ka Jylla naduh u snem 1972.
U la pynpaw ruh ïa ka jingsngewsih halor ka rukom pynïaid ïa ka dorbar ha kane ka Dorbar Mang Tyngka ba mynta.
“Ka jingai por ruh ka long kaba duna shaba palat, kane ka dei ka Dorbar Mang Tyngka kaba lyngkot tam kaba ngi la mad ha ka Jylla…tang 7 sngi. Haba phai sha ki ‘Private Members Business’, la ai por tang 2 sngi bad ka rukom ba la pyrkhing ïa ngi ha ka liang ka por ban ïashim bynta ruh ka long kaba duna shaba palat…tang 10 minit ban ïatai halor ka jingkren u Lat ka Jylla,” u la ong.
Haba pynkynmaw ba u la ju mad teng ban shong dorbar, utei u nongïalam u la ong ba kane ka dei ka sien banynkong ba u Lamphang ka ïingdorbar thawaiñ um shym la pan jingmut na ka liang pyrshah la ban pynjlan ne bud ryntih ïa ka por katkum ka almanak.
U la pynsngew ba ka Sorkar ka la dep bthah lypa ïa la ki MLA (ka liang synshar) ban ïashim bynta wat ha ka mat ka bym ïahap bad ka konstitwensi jong ki bad kane ka dei ruh ka sien banyngkong ba u Lamphang u la ai lad ïa kaba kum kane.
“Kane ka dei ka jingthmu jong ka Sorkar, ki kwah ban phet na la ki jingkitkhlieh hynrei ngin ym shah,” u la ong.
Haba byrngem ba ka seng kan ïaid shakhmat bad ka jingïakhih, u la ong, “Lada ym shah ïakren ïa ngi hapoh dorbar, ngin sa mih sha surok, ïa kaba ngim kwah ban leh ïa kane kum u nongmihkhmat. Kane ka dei ka mat kaba donkam bha namar ka la ktah shi kat dei ïa ki samla ba la pyndep jingpule ba khlem kam ha kane thaiñ shane. Kumta ngi kwah ban ïakren kum ki dkhot ba don ka jingkitkhlieh kumno ngin ïaid shakhmat bad kane ka kam.”
Shuh shuh u la ong ba katei ka jingleh ka long pyrshah ïa u paidbah bad kam ïahap satia bad ki nongrim jong ka synshar paidbah.
“Kane ka long ka jingleh kaba pyrshah ïa ka sur jong u paidbah bad ka jingleh donbor jong u nongpynïaid ka ïingdorbar thawaiñ,” la bynrap u Bah Basaïawmoit.
Kum ban shu kdew, ka kyndon pynïaid dorbar jong ka jong ka ïingdorbar thawaiñ ka Jylla ka kren shai ba ha ka Sngi Thohdieng, ka por shong dorbar ki MLA ka dei naduh 10 baje mynstep haduh 12 baje shiteng sngi.
