Shillong, Lber 24:
U MP ka Congress na Wayanad, u Rahul Gandhi, u la shah mait noh ka kyrteng na ka jinglong MP hadien ba kawei ka ïingbishar ha Surat ka la rai pynrem ïa u ha kaba ïadei bad kawei ka mukotduma.
Katkum ka jingpynbna ba la pynmih da ka Lok Sabha Secretariat ha ka Sngi Thohdieng, la ong ba hadien ba ka ïingbishar jong u Chief Judicial Magistrate ha Surat ka la rai pynrem ïa u Rahul ha ka 23 tarik Lber, 2023, ka jinglong MP jong utei u nongïalam ka Congress ka la duh la dam noh shi syndon katkum ka Article 102 (1) (e) jong ka Riti Synshar ka Ri India bad ka kyndon 8 jong ka Representation of the People Act, 1951.
Kane ka jingduh noh jong u Rahul ban long kum u dkhot ka Ïingdorbar Thawaiñ Lok Sabha ka la treikam naduh hynnin ka sngi kaba dei ruh ka sngi ba ka ïingbishar ka la pynmih ïa ka hukum.
Lah ban kdew ba katei ka ïingbishar hynnin ka sngi ka la rai pynrem ïa u Rahul ha kaba ka jingpynsaja ka long ba un hap shong patok na ka bynta ar snem. Kane ka jingshah rai pynrem ka long halor ka mukotduma ba la ai pyrshah ïa u Rahul hadien ba u la kynthoh ha kawei ka jingïalang ïalap ilekshon kaba la long ha u Ïaïong 2019 ba balei ba baroh ki nongtuh nonglute ki dei na ka jait Modi.
Ka ïingbishar ka la daiñ kuna ruh T. 15,000 na u Rahul hadien ba ka la shem ba u la leh bakla katkum ka kyndon 499 bad 500 jong ka Indian Penal Code. Kine ki kyndon ki ïadei bad ka jingpynsaja na ka bynta ka bai mynraiñ khmat lane ‘Defamation’.
Hadien ba u Rahul u la kyrpad ïa ka ïingbishar, ka ïingbishar ka la ai jamin ïa u khnang ba hapoh ki 30 sngi, un lah ban leit sha ka ïingbishar ba kham shalor ban pyrshah ïa katei ka hukum jong ka ïingbishar u Chief Judicial Magistrate.
Ki kyndon aiñ ki batai ba kino kino ki MP lane ki MP kiba shah rai pynrem bad ba ka jingpynsaja ka long palat ar snem, kita ki MP ne ki MLA kin duh noh ïa ka jinglong dkhot ki Ïingdorbar Thawaiñ.
Lah ban kdew ba ha ka jingshisha, ha ka por jong ka sorkar Congress ha u snem 2013, la wanrah ïa kawei ka aiñ ba shipor lane ka ‘Ordinance’ ban pynkylla ïa ka hukum jong ka Supreme Court ha uto u snem. Ka hukum jong ka Supreme Court ha u Ïaïong 2013 ka la hukum ba kino kino ki MP ne MLA kiba shah rai pynrem ban shong patok ar snem, kin duh noh shi syndon ïa ka jinglong MP ne MLA. Hashwa jong u 2013, ki MP ne ki MLA kiba shah pynduh ban long ki dkhot ka Ïingdorbar Thawaiñ ki ïoh por lai bnai ban leit kyrpad ïa ka ïingbishar ba kham shalor. Hynrei hadien u 2013, ïa kane la pynduh noh.
San bnai hadien jong u Ïaïong 2013, ka sorkar Congress ha Delhi ka la pyrshang ban wanrah da ka Ordinance ban pynkylla ïa katei ka rai jong ka Supreme Court pyrshah ïa ki MP bad MLA. Ha kato ka por, u Rahul u la mih shakhmat ban pyrshah ïa ka Ordinance bad u la tar syndon ïa ka hakhmat ki lad pathai khubor.
Na ka liang ka sorkar Congress ruh ka la kynran dien noh ban pyntreikam ïa katei ka Ordinance. Lada u Rahul u la ailad ha kato ka por ïa kato ka Ordinance, un jin da la lait na ka jingduh long MP shi syndon hadien ka rai jong ka ïingbishar ha Surat.
