Shillong, Lber 24:
Ka South Garo Hills Dis-trict Cricket Association ka la lah ban pynliem noh ïa ka West Jaintia Hills District Cricket Associa-tion da 133 run ha ka lympung U-14 Girls Inter District T20 Tournament 2023 kaba la long ha ka sngi Thohdieng ha Nongstoin.
Ha kawei pat ka jing-ïalehkai ka East Khasi Hills Cricket Association ka la lah ban pynliem noh ïa ka West Khasi Hills District Cricket Association da phra wiket.
Haba phai sha ka jingïalehkai, ka South Garo Hills kaba la tied nyngkong ka la kamai haduh 197 run na ki 20 tylli ki over bad hap noh 6 wiket, ha kaba ka Dejiansua M Sangma ka la tied 38 run bad ka Magdaline M Sangma ka la tied 37 run. Katba ka Carieyoka Lyngdoh ka la khur 3 wiket bad ai 44 run bad ka Anastesia S Shullai ka la khur 2 wiket bad ai 40 run.
Haba beh ïa kane ka thong kaba heh, ki nongtied ka West Jaintia Hills ki la khyllem lut hadien ba ki la kamai tang 64 run bad dei tang ka Sawakahi Syngkon kaba la kamai 24 run. Ka Shreya R Marak, ka De-jiansua bad ka Awesaina S Marak ki la ïoh ban khur mar 2 wiket.
Ha kawei pat ka jingïalehkai, ka East Khasi Hills kaba la jop ka jingkynting pisa ka la kam trai ban kawang bol nyngkong bad ka la lah ban tehlakam ïa ki nongtied ka West Khasi Hills, kiba la kamai tang 78 run bad hap 7 wiket, hadien ba la pynhiar noh tang sha ki 15 tylli ki over.
Ka jinglah jong ka WKH ban kamai haduh 78 run ka la wan lyngba ki ‘Extras’ ne ka run ba la shu ai ei kumto da ki nongkawang bol, kata haduh 44 run, kata ba shu kamai run khlem pynshitom. Dei tang ka Mendy Adreena L Mawlong kaba la tied marwei 10 run katba ka Habanda-risha Shangpliang ka la khur 3 wiket bad ai tang 10 run.
Kumjuh ruh ka East Khasi Hills ka khlem da donkam eh ban pynjynjar haba beh ïa kane ka thong, ha kaba ka run ba la shu ai ei da ki nongkawang bol ka West Khasi Hills ki la long haduh 46 run bad dei tang ka Sharaisuk Marpna kaba la kamai 14 run bad ka Eliza Lyngdoh ka la kamai 10 run ban ïalam ïa ka kynhun sha ka jingjop.
