Shillong, Lber 24:
U MLA ka BJP na Pynthorumkhrah konstitwensi uba dei ruh u Myntri Sorkar, u Bah A.L Hek, u la ong ba ka jingkren Hindi ha Ïingdorbar Thawaiñ kam dei shuh ka sien kaba nyngkong, ka la don ha ki snem ba la dep ruh ba u Lat ka jylla u kren da ka ktien Hindi hapoh ka Ïingdorbar Thawaiñ.
U Bah Hek u la ong ba kat ha man ba sdang ka dorbar jong ka Ïingdorbar Thawaiñ ka Jylla, la sdang shwa da ka jingrwai ieid ri jong ka ri India lane National Anthem.
U Bah Hek uba la ong ba ka jingpyrshah u Bah Ardent Basaïawmoit bad ka VPP ha ka 20 tarik mynta u bnai kaba dei ka sngi sdang ka dorbar mang tyngka, ïa u Lat haba u ai jingkren da ka Hindi, ka dei kaba ym ïahap namarba ka ktien Hindi ka dei kaba kren salonsar ha baroh kawei ka ri, la ka dei ha parliament bad ha kiwei ki Ïingdorbar Thawaiñ ha kiwei ki Jylla ki kren da ka Hindi hi bad ym lah ban khang ban kren la ka dei ha Parliament ne ha ki Ïingdorbar Thawaiñ jong ki Jylla.
U la ong ba kumno yn pyrshah ïa ka jingkren u Lat da ka Hindi namar u ïohsngew ba ka VPP bad ki kyrtong jong ka ruh ki kren da ka Hindi ha Pynthorumkhrah, bad ha North Shillong ruh ki kren ha ka por ba ïalap ilekshon.
Haba kylli la kane ka jingkren Hindi ka dei kaba la bthah naduh ka Sorkar Pdeng ban pynrung jubor ïa ka ktien Hindi kumba la kynnoh, u Bah Hek u la kyntait ïa kata, bad u la ong ba ki Lat bapher bapher ha ki jylla jong ka ri, ki don kiba nang ban kren ktien phareng, ki don ki bym nang ruh bad ki lat ki kren ha ka ktien kaba ki lah ban kren bad u Lat jong ka Jylla ruh u kham suk ban kren da ka Hindi.
Shuh shuh u la ong ruh ba ka jingpyrshah jong ka VPP ïa ka jingkren u Lat kam don nongrim eiei namar la pynïaid ïa ka dorbar jong ka Ïingdorbar Thawaiñ katkum ki kyndon jong ka Riti Synshar ka ri India.
