Shillong, Lber 24:
Ka Meghalaya Film Makers Association hapoh ka jingïalam u Bah Commander Shangpliang kum u President, ka la pynpaw ka jingai khublei ïa ka sorkar jylla hapoh ka jingïalam u Conrad K Sangma kum u Myntri Rangbah ba u la lah ban mang pisa kyrpang haduh T.15 klur na ka bynta ban kyntiew ïa ki kam shna phlim hapoh ka jylla.
U Bah Commander u la ong ba watla ka dei ka jingmang pisa kaba khyndiat, hynrei ka la dei pat ka jingsdang ban ai mynsiem ïa ka kam shna phlim namar mynshem snem ka sorkar ka la mang tang T.5 klur, katba mynta pat ka la kiew lai shah. Kane ka pyni ba ka sorkar jylla ka la shimkhia ïa ka kam pynmih phlim hapoh ka jylla.
U la ong ba ka ‘Hello Meghalaya’ ka dei kumba ai mynsiem ïa ki samla ban kyntiew ïa ki kam pynmih phlim naduh kiba thoh khana, ki nongthaw jingrwai, ki nongpynwandur bad ïa kiba ringdur ruh.
Nangta u la ai khublei ïa u Bah Charles Marngar uba la kren ha ïingdorbar ba donkam cinema ïa ki nongshna phlim, nangta u Bah Paul Lyngdoh, Myntri ka sorkar jylla uba la kular ban pynïoh hall, ka Kong Ampareen Lyngdoh kum ka Myntri Sorkar ruh ka la pynpaw ban kyrshan ïa ki phlim Khasi haba ki ai jingkren ha ka 1st Meghalaya International Film Festival kaba dang shu dep long shen.
“Ngi don jingkyrmen ba da ka jingmang pisa ka sorkar Meghalaya ïa ki kam shna phlim kan ai mynsiem ïa ki samla ban shna bun ki phlim bad nga kyrpad ïa ki paidbah ban ai jingkyrshan ïa ki phlim Khasi” u la ong.
Nalorkata, u la pyntip ruh ba ïa ka International Film Festival yn sa pynlong biang ha u snem ban wan tangba ki hap ban peit ïa ki bnai kiba lait lut baroh namar ha kane kaba la dep la pynlong ha u Lber namar ka jingpynkynriah na u Nohprah.
Shuh shuh u la batai ba ka seng ka la dep ïakren bad ka sorkar halor ka ‘Hello Meghalaya’ kaba dei ka OTT Platform ba ka sorkar ka dei ban siew kham bha ïa ki phlim lada ka kwah ban thep khnang ban ïarap ïa ki nongpynmih phlim namar shisien ba la pyllait ha kane ka rynsan ki paidbah kin sei tuh beit.
U la ong ba ka shong ha ki trai phlim ki kwah ban ai ïa ka phlim jong ki kaba thymmai ne ki ai hadien ba la pyllait ha ki cinema ban thep ha kane ka ‘Hello Meghalaya’.
