Shillong, Lber 24:
U nongïalam ka All India Trinamool Congress (AITC), u Dr. Mukul Sangma u la ong ba ka rukom leh jong kane ka Sorkar ba mynta ban pynduna ïa ka por shong dorbar na bynta ban ïakren bad ïatai halor ki mat bapher-bapher ka pyni ïa ka jinglong kloi jong ka ban phet na ki kam kiba ka hap ban kitkhlieh.
“Khamtam haba ngi don hapdeng ka dorbar bad haba ngi mynjur ïa ka mang tyngka kaba pura. Kumta ngi donkam ban ïoh por ban ïakren bad ïatai ban wanrah ka jingsngew skhem ha ka jingmut ki paidbah ka Jylla,” la ong u Sangma haba kren sha ki lad pathai khubor ha ka Sngi Thohdieng.
U la ong ruh ba ha ryngkat ka bor ka wan lang ka jingkitkhlieh bad kumta katei ka kdew shai ïa ka jingthmu kaba ki la don lypa ban phet na ki kam kiba hap ban kitkhlieh.
Katkum ka jingong jong u, katei kam ïahap satia bad ki nongrim jong ka synshar paidbah kaba pyrshang ban pynneh-pynsah na ka por sha ka por.
U Dr. Sangma u la ong ruh ba la khmih lynti ba lada ka dorbar ka lyngkot shaba palat – tang 2 sngi na bynta ki mat ba la wanrah shimet da ki dkhot ka ïingdorbar ne ki ‘Private Members Business’, kumjuh ha ‘Government’s Business’, ka don tang shi sngi ban pynkhuid ïa ki ‘Supplementary Demand for Grant’ bad kawei pat ban ïakren halor ka mang tyngka, kumta ka ïing kan ym ïoh por ban khmih bniah.
“Kam dei ka jingkylli halor ka jingkitkhlieh jong ki dkhot ka ïingdorbar. Ka dei ka kamram kaba la khmih lynti na baroh ki dkhot jong ka ïingdorbar, ki dkhot jong ka liang synshar bad liang pyrshah kumjuh,” la ong u Sangma.
U la ong ruh ba lada kane ka rukom ka ïai bteng, kata kan ym long ka nuksa kaba itynnad ïa ka Jylla.
U la ong ruh ba kum ki nongïalam ka Jylla, ka jingpynleit jingmut ka dei ban long beit na bynta ka bha ka miat jong u paidbah ba bun balang.
Shuh shuh u la bynrap ba kumba ju long baroh shi katta, ka Dorbar Mang Tyngka jong ka ïingdorbar bathymmai, ka dei beit ka ‘Vote on Account’ bad hadien kane ka Sorkar ka wan biang bad ka mang tyngka ba pura.
U Dr. Sangma u la ong ruh ba ha ki por ba la leit noh, la pynjlan ïa ka jingshong dorbar na ka por ba la buh khnang ban ai lad ne ai jaka ïa kaba donkam lada sngew ba ka jingshong dorbar ka long kaba lyngkot.
Kum ban shu kdew, ka kyndon pynïaid dorbar jong ka jong ka ïingdorbar thawaiñ ka Jylla ka kren shai ba ha ka Sngi Thohdieng, ka por shong dorbar ki MLA ka dei naduh 10 baje mynstep haduh 12 baje shiteng sngi.
