Shillong, Lber 24:
U Myntri Rangbah ka Jylla, u Conrad K Sangma u la ong ba ka Uniform Civil Code (UCC) Bill ka dei kaba la wanrah shimet bad ym pat don kano kano ka aiñ kaba la mynjur da ka Rajya Sabha haba ïadei bad ka UCC.
U Conrad u la ïathuh ba la wanrah ïa ka UCC Bill kum ka ‘Private Members Bill’ lane kaba la shu wanrah shimet, bad kam pat dei ka aiñ kaba la wanrah hi da ka Sorkar Pdeng ha Ïingdorbar.
U Myntri Rangbah u la jubab ïa kane haba jubab ïa ka jingkylli jong u MLA ka Mawryngkneng, u Bah Heavingstone Kharpran uba la kylli halor ka nongrim ba ka Sorkar Pdeng ka ïeng haba ïadei bad ka Uniform Civil Code. U Bah Kharpran u la ong ba ïa ka UCC la mynjur da ka Rajya Sabha ha ka 9 tarik Nohprah, 2022.
Hynrei u Conrad u la pynshai ba kam pat don kano kano ka jingmynjur ïa ka UCC ha katei ka sngi bad ka tarik.
