New Delhi, Lber:
Kum shi bynta ban khanglad ïa ka jingthmu jong ki nongkhaïa tuh, ki shipai jong ka tnat BSF hapoh ka South Bengal Frontier ki la ïoh ban kurup kumba 373 tylli ki bitor dawai Phensedyl bad 2 ngut ki nongkhaïi tuh ki la shahkem na ka thaiñ Indo-Bangladesh International Border. Kumba la antad la ong ba kine ki dawai ba la ïoh ban kurup ki la kot sha ka T. 75,182/-.
Kine ki nongkhaïi tuh ki la pyrshang ban kit ïa kine ki song jong kine ki dawai na India sha Bangladesh.
Kane ka jingjia ka la jia nyngkong ha ka 22 tarik, Lber, ha ka thaiñ ba dei khmih ka Border Out Post Sabdalpur jong ki shipai BSF jong ka kynhun 70 Battalion.
Haba la ïoh jingtip na ki kynhun wad bniah, ki shipai ki la khmih bniah na ki CCTV Camera duty, ha kaba ki la ïohi ïa arngut ki nongkhaïi tuh kiba la ïaid ban poi sha u International Border ha ryngkat ki pla borni.
Mar ïa ïohi ïa kane, ki shipai bran bran ki la leit sha katei ka jaka ha kaba ki la pynibor bad kem noh ïa kine ki briew.
Ha kane ka por la ïoh ban kurup ïa 298 bitor ki dawai Phensedyl na kine ki nongkhaïi tuh kiba la shahkem.
Ïa kiba la shahkem la tip kyrteng kum u Mahibur Sheikh bad u Faizul Shaikh, jong ka District Malda. Kine kiba la shahkem ki la phla ba ki la ïoh ïa ka dawai Phensedyl na Ishab Sheikh bad u Irshad Sheikh, jong ka District Malda bad ki la ïaid lyngba na ki jaka ba la pyntreikam ïa ki shipai ïada ri bad aiti ïa ki sha u Sohail Sheikh, jong ka District Chapinavganj, Bangladesh. Hynrei ki shipai BSF ki la ïohkem noh ïa ki ha ka lynti ïaid jong ki.
Haba ki shipai ki la ïohi ïa ka jingnang bun jong ki nongkhaïi tuh, ki la pynjur bad nang bteng ban pynkhlaiñ ïa ki jingpahara ha ki bynta khappud jong ka India bad Bangladesh khamtam hadien ba la ïoh ban kurup ïa ki mar bad ban kem ïa ki riewshimkabu kiba ju mlien ban khaïi tuh ha ki bynta khappud.
Kane ka jingnang pynkhlaiñ ïa ka jingpahara ka la long hadien ba ki shipai ïada khappud ki la buh hakhmat eh ïa ka thong halor ka jingpynduh pyndam noh ïa kine ki kam beaiñ kiba la ïai bteng na ka por sha ka por.
Kumba la sakhi la ong ba wat ha une u bnai ba mynta ym pat ïohkem ïa ki briew kiba ju mlien ban khaïi tuh, na ka liang ki bor shipai ki la ïai bteng ïa ka kam na ka bynta ban pynkhlaiñ ïa ka jingpahara khnang ban khanglad ïa kum kine ki jingjia.
Ha u snem ba la lah, ki la don kumba ar tylli ki jingjia ba la jia ha ki ar tylli ki jaka, ha kaba ka kynhun shipai Border Security Force (BSF) ka la ïoh ban kurup kumba 74 tylli ki biskit ksiar, lai tylli ki lyngkhot ksiar bad saw tylli ki biskit ksiar ha khappud India-Bangladesh ha North 24 Parganas distrik jong ka West Bengal.
Ki la don kumba arngut ki nong India kiba dei ki nongkhaïi ksiar kiba la shahkem ha kaba ïadei bad kane ka jingjia.
Ka jingdon jong baroh ka ksiar kaba la ïoh ban kurup ka la long 11.62 kg bad ka dor jong kane ka la long T. 6.15 klur.
Ha kaba ïadei bad kawei pat ka jingjia, ha ka por ba la don ka jingleit khmih bniah, ka kynhun shipai 158 Battalion ka la lap ïa kawei ka kali ar shaka ha kaba hadien ka jingkhmih bniah la lap ïa saw tylli ki biskit ksiar kiba don ïa ka jingkhia kaba 466.62 gm.
Ha ka por ba la pynlong ïa ka jingtohkit, u briew ïa uba la tip kyrteng kum u Marub Mandal (36) u la phla ba u la donkti ha ka ban khaïituh ïa ka ksiar.
Shuh shuh u la ïathuh ba u la shim ïa ka ksiar na u Bablu Mandal ha kaba la thmu ban aiti ïa ka sha u Hafeezul Shaikh.
Ïa utei uba la shahkem la aiti sha Customs Office, kaba don ha Petrapole ha ryngkat ka ksiar ba la ïoh ban kurup.
Kum shi bynta ban pynpaw ïa ka jinglah jong ki shipai ban wanrah jingjop ha kaba ïadei bad ka jingkhanglad ïa ki kam khaïi tuh ha ki bynta khappud, u nongaiktien jong ka South Bengal Frontier u la ai ka jingïaroh ïa ki shipai.
U la buh ka jingkyrpad ïa ki briew ba kim dei ban ïaid da ka lynti ban pynjur ïa ki kam khaïi tuh.
U la ong ba ki shipai jong u kin ym ailad ïa ka kam khaïi tuh ne kiwei pat ki kam sniew ha ki bynta khappud bad lada lap yn ym map ïa ki briew kiba donkti ha kum kine ki kam.
