Basel, Lber:
Ka long ka khubor jong ka jingduhnong kaba khraw na ka bynta ka khlur ialehkai Badminton ka ri ka PV Sindhu ha kaba kam shym lah ban dang iai iada ia ka khusnam jingjop jong ka Swiss Open Super 300 Badminton. Kane ka wan jia hadien ba katei ka nong-ialehkai ka lah shah pynliem bad shah pynkut noh ka jingiaid lynti ha ka lympung ialehkai mynta u snem ha ka nongialehkai kaba na Indonesia ka Putri Kusuma Wardani ha ki lai jing-iakhun jong ka kylla iakhun -ba ar ha ka jing-iakhun paramarwei.
Shuh shuh ruh ka khubor ka iathuh ba ka Sindhu kaba shong mynta ha ka kyrdan ba 9 ha ka pyrthei bad kyrdan ba saw ha katei ka lympung ialehkai ba mynta, ka lah mad ia katei ka jingshah pynliem noh ka jong ka da 15-21 21-12 18-21 ha katei ka nongiakhun pyrshah kaba long ruh ka sien kaba nyngkong ba ki arngut ki iakynduh ha kum katei ka lympung ialehkai bar-ri.
Hynrei haba phai pat sha ka jingiakhun jong ki shynrang ha ka kyrdan iakhun ba mar arngut, u Satwiksairaj Rankireddy & Chirag Shetty ki la lah ha ka ban iai pynkaweh ia ka lama lai rong ka ri ha katei ka lympung da kaba rung mynta sha ka rynsan iakhun quarterfinals da ka jingiakhun kaba tyngeh jong ki tad haduh ba kin da lah ban khur noh shalade ia ki 12-21 21-17 28-26 jingjop pyrshah ia ki rangialehkai na Taiwan; u Fang-Chih Lee & Fang-Jen Lee.
Hadien katei ka jingjop, ki arngut kin hap ban iakhun pyrshah sa bad ki rangialehkai na Denmark u Jeppe Bay & Lasse Molhede. Kham hashuwa, u H S Prannoy u lah shah pynkut noh ka jingiaid lynti ka jong u ha ka kylla iakhun kaba ar hadien ka jingshah rem noh ha u nongialehkai na France u Christo Popov da 8-21 8-21.
Hynrei u dei pat u Kidambi Srikanth uba nyngkongeh ban khyllem noh na ka lympung iakhun ha ka jingiakhun paramarwei ha shuwa u Prannoy da ka jingshah rem noh ha u nong-ialehkai na Hong Kong u Cheuk Yiu Lee da 22-20 21-17.
Kumjuh ruh u lahduh ha ka ri u Mithun Manjunath ruh u lah mad ia katei kajuh ka bynta da ka jingshah pynwai noh ka jingiaid lynti ha ka lympung ha ka kylla iakhun kaba ar ha da 19-21 10-21 ha Chia Hao Lee ka Chinese Taipei.
