Shillong, Lber 24:
Ka lympung ïakob siat khnam ba la tip ïa kaba la tip kum ka 2nd NTPC National Ranking Archery Tournament (NRAT) 2023 (Junior category) ka la poi noh sha kaba kut, ha kaba ïa kane ka lympung la pynhap pyrda noh ha ka sngi Thohdieng.
Ïa kane ka lympung la pynlong da ka Archery Association of Meghalaya, ha ka madan jong ka SAI STC kaba don ha NEHU. Ha kane ka sngi pynhap pyrda, la ïoh ruh ban sam ïa ki takma bapher bapher sha ki nongïalehkai kiba la khur jingjop bad ruh kito kiba khlem jop ïa ka final.
Ha kane ka sngi pyn-kut noh ïa kane ka lympung, la ïadon lang ryngkat ki kynrem ki lyndan kiba kynthup ïa u Dr Vijay kumar, IAS, Com-missioner bad Secretary ka tnat Sports & Youth Affairs, u V Argawal, IAS, Director ka tnat Sports & Youth Affairs, u Bah Finely Pariat uba dei u General Secretary ka MSOA, u Ian Campbell, Edge 10, Kong Matsiew-dor War Nongbri, IAS, kaba dei ruh ka President jong ka Archery Associa-tion of Meghalaya.
Ha kane ka jingïakob, uwei na ki rangïalehkai ka jylla Meghalaya kata u Devraj Mohapatra u la lah ban wanrah nam da kaba u la lah ban pyndep ha ka kyrdan kaba lai. U Devraj Mohapatra u la ïoh ïa ka kyrdan kaba lai ha ka kyrdan ïakhun jong ka Sub Junior Boys Recurve Division bad ruh ïa ka kyrdan kaba lai ha ka ïakhun jong ka Junior Boys Recurve Division.
Hadien ba kane ka lympung ka la long kaba jop bad kaba la ïaid beit, kumta mynta yn sa pynbud pat sa da ka jingïakhun ha ka kyrdan jong ki Senior ka ban sa sdang ha ka 26 bad 27 tarik mynta u bnai, ha kaba ki nongïalehkai ba paw jong ka ri, kin wan ban mih madan ban pynpaw ïa la ka jong ka sap bad ka jingtbit.
Ïa kane ka lympung ka ban sa long ha kitei ki ar sngi yn tip ruh kum ka 2nd NTPC National Ranking Archery Tourna-ment (NRAT) 2023 (Senior Category).
