Shillong, Lber 24:
Ka United Democratic Party (UDP) Sengkmie hapoh ka jingïalam u Bah Metbah Lyngdoh kum u President kin sa leit ban pynbna lashai ka sngi (sngi saitjaiñ) ïa ka kyrteng jong u Bah Synshar Lyngdoh ba un long u kyrtong ka seng ban ïakhun ïa ka ilekshon MLA ka ban long shen ha Sohïong konstitwensi.
Kane ka jingleit pynbna ïa ka kyrteng jong u Bah Synshar ka dei hadien ba u Bah HDR Lyngdoh, kyrtong ka UDP u la khlad noh kyndit-kynsan ha ka 20 tarik Rymphang, 2023 kata shi taïew shwa ba ki paidbah kin leit thep vote ha ka 27 tarik Lber, 2023. Da kane ka jingjia ka Election Commission ka ri India ka hap ban pynsangeh shwa ïa ka ilekshon ha katei ka konstitwensi.
Haba pyntikna ïa kane, u Bah Alantry Dkhar uba dei u Vice-President ka UDP Sengkmie, u la ïathuh ba lashai ka sngi (sngi saitjaiñ) ki nongïalam ka UDP kin leit ban ïakynduh shwa ïa ki nongkitkam ka UDP Sohiong circle. Hadien kata kin sa pynlong ïa ka jingïalang paidbah ha phylla ïing u Bah HDR Lyngdoh ha Sohïong ha ka por 1:30 noh phai sngi ban pynbna ïa ka kyrteng u Bah Synshar Lyngdoh, uba dei u pyrsa jong u Bah HDR kum u kyrtong ka UDP.
U la ïathuh ruh ba ïa kane ka jingpynbna yn leit hi da u Bah Metbah Lyngdoh kum u President ryngkat ki MLA, ki MDC ka UDP.
Kumta u Bah Alantry u don jingkyrmen ba ka UDP kan ïoh ïa ka jingjop ha Sohïong konstitwensi namar ki paidbah ki kwah ïa ka jingkylla.
Kum ban shu pynkynmaw ka jingïakhun ha Sohïong konstitwensi la sakhi ba ha man ba don ki jingïalang paidbah, ka jingbun paid ka long beit hapdeng u Bah HDR Lyngdoh kyrtong ka UDP (bam kwai ha dwar u blei) bad u Bah Samlin Malngiang kyrtong ka NPP.
Wat la u Bah HDR Lyngdoh u la khlad mynta la shi bnai tam, hynrei ka tnat ilekshon ka dang pynsahteng ban pynbna ïa ka tarik ban pynlong ïa ka ilekshon. Hynrei ki paidbah ki angnud dik-dik ban poi noh ka sngi jied ïa u nongmihkhmat uba thymmai hadien ba ki 59 tylli ki konstitwensi ki la dep.
Ha katei ka konstitwensi ki kyrtong ki ban ïakhun ïa kane ka ilekshon ki don hynriew ngut, kita u Bah Samlin Malngiang na ka NPP, u Bah Osborne Kharjana na Congress, u Bah Stoding Thabah na TMC, u Bah Serap Eric Kharbuki na BJP, u Bah Sandondor Ryntathiang na HSPDP bad u Bah Synshar Lyngdoh na ka UDP.
