New Delhi, Lber:
Ka long ka sngi kaba kmen bad ba seisoh na ka bynta ka kynhun iakura jong ki kynthei ka ri kiba lah shimbynta ha ka lympung ialehkai ba mynta ha nongbah Delhi ka Women’s World Championships, ha kaba ki saw ngut ki thei iakura ba pawkhmat ka ri kaba kynthup ia ka Nikhat Zareen (50kg), Lovlina Borgohain (75kg), Nitu Ghanghas (48kg) bad Saweety Boora (81kg) ki lah jam mynta sha ka rynsan iakhun phainal da ka jinglah jong ki ban khur jingjop ha ki kyrdan iakura ba ki shimbynta ha ka lympung.
Ka khubor ka iathuh ruh ba ka Nikhat ka la lah ban pynliem noh ia ka nongkhur takma Rnong na ka Rio Olympics ka Ingrit Valencia na Colombia da 5-0, ka Lovlina ia ka nongiakhun na China ka Li Qian da 4-1 ki long ki nongialehkai kiba lah khur ia ka sien kaba lai ka jog ki sha katei ka rynsan iakhun ha kum katei ka lympung ialehkai ba paw ka ri. Shuh shuh ruh kiwei pat ki arngut ki nongiakura ka ri kata ka Nitu ka la lah ban khur noh shalade ia ki 5-2 jingjop pyrshah ia ka lahduh Asian Games ka Alua Balkibekova na Kazakhstan katba ka Saweety ka lah rung sha ka sien kaba ar ha ka rynsan iakhun phainal ha katei ka lympung ialehkai da ka jinglah ban pynliem noh ia ka Sue-Emma Greentree na Australia da 4-3. Ka khubor ka iathuh ruh ba ka Nguyen Thi Tam na Vietnam ka ieng mynta hapdeng ka Nikhat bad ka jingangnud jong ka ban rah ia ka takma Ksiar kaba ar na katei ka lympung ialehkai.
