Mumbai, Lber:
Katkum ka khubor ba la iathuh da u rangialehkai Kriket barim ka Australia bad uba long ruh u symbud nongpyniaid ba mynta jong ka kynhun ialehkai Indian Premier League (IPL) ka Delhi Capitals u Shane Watson, u iathuh ba u kapten ba thymmai jong katei ka kynhun ialehkai u David Warner u don ia ka bynta bad ka mat kaba kongsan tam eh ha ka ban pynshisha ialade kum u nongialehkai ba tbit bad kum u nongialam ba thymmai jong katei ka kynhun ialehkai ha katei ka lympung ka ban sdang naduh ka 31 tarik mynta u bnai.
Shuh shuh ruh ka khubor ka iathuh ba u Warner uba lah pyniasoh bad katei ka kynhun ha ka jing-iaid lynti jong ka ha ka aiom ialehkai ba la dep long ha u snem 2022, lah shah kum u nongialam ka kynhun na ka bynta ka lympung ialehkai mynta u snem na ka daw ba u Rishabh Pant u lah hap ban weng noh ialade na ka kynhun namar jong ka jingmynsaw kaba jur kaba u lah ngat ha ka jingiatyngkhuh kali ha u snem ba la dep jong u bnai Nohprah.
Kumta ruh u Warner u la dep ban pyniaid ia katei ka kynhun ialehkai ha ki por ba lah leit noh bad hadien kata sa ia ka Delhi Daredevils bad uba lah long ruh uba lah seisoh kum u nongialam jong ki ar kynhun ialehkai ha katei ka lympung ha ryngkat bad ka kam shakri jong u ha ka Sunrisers Hyderabad da kaba ialam ia ka kynhun ban khur tang shisien ia ka trophy jingjop na ka lympung ialehkai ha u snem 2016.
U Warner u lah long ruh u nongialehkai uba lah seisoh bha ha ka kam shakri jong u ha ka SRH, hynrei ka bym shym la lah ban ialehkai bha ha ka kam tied bad ka jingiapher jingmut kaba khah-khah bad ki nongpyniaid bahalor ka kynhun ka pynlong ia ban mih noh na ka kynhun ialehkai ha ka aiom ialehkai jong u snem 2021.
Kumta ruh utei u nongkamai ron bahakhmat eh napdeng baroh ki nongialehkai kiba na sha shiliang duriaw kata da haduh 5,881 ron, u Warner u lah shah weng noh kum u kapten bad iai shah pynshong-ben ha ka kynhun bad hadien kata uba lah shah pyllait noh na ka kynhun ialehkai ha ka iew iadie-iathied rangialehkai kaba heh tam ha u snem 2022.
U long ruh u rangialehkai uba lah mad ia ka jingiaid lynti kaba sniew ha ka kam ialehkai jong u ha ka jingleit ban iakhun ka kynhun Aus sha India ha ki jingiakhun ba dangshen, ha kaba um shym la lah ban pynwandur ia ka rukom tied ka jong u ha ki ar tylli ki jingialehkai Test ha Nagpur bad Delhi bad uba la lah ban kamai tang haduh 23 ron ha kawei ka jingiakhun ODIs kaba u lah ioh bna ialehkai. Ka khubor ka iathuh ruh ba u Shane Watson u lah jied ruh ia u rangialehkai ka South Africa u Rilee Rossouw kum u Trump Card na bynta ka Delhi Capitals ha kaba iadei bad ka IPL mynta u snem.
