Mumbai, Lber:
Ki la don kumba lai ngut ki briew ki bym don ïing don sem kiba kynthup ïa arngut ki rangbah bad kawei ka longkmie kiba la shahkem haba ki la tih thliew ha ka kynroh jong kawei ka jingkieng ba la tip kum ka French Bridge kaba don ha Opera House, ha Girgaum. Kine kiba la shah kynnoh ki dei kiba la tip kyrteng kum u Surajkumar Radhelal Yadav, Kiran Kamble bad ka Nisha Thapa.
U Kamble bad ka Thapa ki dei ki nongdie syntiew, u Yadav u dei u bym donkam-donjam, la ïathuh ki pulit. Ïa ka jingmudui la buh hadien ba u heh jong ka Brihanmumbai Municipal Corporation (BMC) u Raosaheb Sangolkar u la lap ïa ka thliew kaba lai phut ka jingheh bad ar phut ka thliew ha katei ka jingkieng. Kumba la ïathuh u Sangolkar, la ong ba u la ïohi ïa ka Video ba la ring da uwei u briew ba la tip kyrteng kum u Jagdish Rele ha kaba la ïohi ba kine ki lai ngut ki briew ki la tih ïa ka thliew ha katei ka jingkieng.
“Ngi la buh ka jingujor ba la pyndonkam bakla ïa ka surok,ka jingkieng, ka wah ne ka nala hapoh ki kyndon jong ka Indian Penal Code bad halor ka jingpynsniewdur ïa ka jingpyndonkam ki paidbah ba la pynngat hapoh ka Prevention of Damage to Public Property Act, 1984,” la ïathuh u heh pulit na ka jaka treikam jong ki pulit ka Gamdevi. Ka BMC ka la pyndam noh ïa katei ka thliew ba la tih.
