Shillong, Lber 24:
U Myntri ka tnat pule-puthi ka Jylla, u Rakkam A. Sangma ha ka Sngi Thohdieng u la ong ba ka Sorkar India ka la pyllait ïa ka kylla ba ar na bynta ban siew ïa ka tulop jong ki nonghikai SSA katba ïa ka tulop ba dang sahteng yn sa pyllait noh shen.
“Ka Sorkar Jylla ka pyrshang ban pynbiang ïa ka pule-puthi kaba paka ha baroh ki liang wat hapdeng ki jingtynjuh bapher-bapher. Ka Sorkar Jylla ka la shim ïa ka sienjam kaba kynthup lang ban shimkhia ïa ki jingpynsngew jong kiba bun jait ki kynhun nonghikai hapoh ka Jylla,” la ong u Myntri haba jubab ïa ka ‘Call Attention’ ba la wanrah da u MLA ka Nongpoh, Bah Mayralborn Syiem halor ki nonghikai SSA kaba la mih ha kawei na ki lad pathai khubor.
U la ong ruh ba ka Sorkar Jylla ka tip shaphang ki jingdawa bapher-bapher kum ka kyndon mang tyngka ha ka mang tyngka ka Jylla, ka jingpynwandur bad jingkyntiew tulop, ka jingpynïasoh lang jong ki nonghikai SSA na SEMAM sha ka tnat pule-puthi, ka jingpyndap ïa ki jaka ba sah thylli jong ki SSA, ka jingphah ïa ka tulop sha ki ‘account’ bad ka jingpynskhem kam ïa ki nonghikai SSA.
U Myntri u la ïathuh ruh ba ha u 2021-22, ka jingpyllait pisa na ka Sorkar India ka long T.305.84 klur bad ka Sorkar Jylla kan synñiang T.30.19 klur. Kumta ka Sorkar Pdeng ka la pyllait T.271.71 klur bad ka bynta na ka Sorkar Jylla ka long T.30.19 klur. Ïa ka jingduna ha ka jingpynlut, la khmih da ka Sorkar Jylla lyngba ka ‘Corpus Fund’.
“Ka jingpyllait pisa da ka Sorkar India ha u 2022-23 ka long T.372.36 klur bad ka Jylla kan synñiang T.41.37 klur. Haduh u Rymphang 2023, ka bynta na ka Sorkar Pdeng kaba ka Jylla ka la ïoh pdiang ka long T.272.34 klur bad ka bynta jong ka Jylla ka long T.30.26 klur,” u la ong.
U Sangma u la ong ruh ba ka Jylla ka la pyllait shuh ïa ka bhah, ‘Corpus Fund’ kaba kot sha ka T.104.62 klur nalor ka jingdonkam kaba 10% ka bynta jong ka Jylla kaba kot sha ka T.30.19 klur haduh u Rymphang 2023.
Na ka liang u Myntri u la pynsngew ruh ba ka jingtyrwa ban pynkut noh ïa ki jingeh jong ki nonghikai SSA ha ka liang ka tulop ka shong beit ha ka pisa ba la mang da ka Sorkar Pdeng.
Ha kajuh ka por, u Sangma u la ong ba ka Sorkar Jylla ka don ha ki kylla ba khatduh ban thaw ïa ka Meghalaya State Education Commission (MSEC).
“Nga kular ba hadien ba la thaw ïa ka MSEC, ngin sa wanrah ïa ki mat treikam bad ki lad ki lynti ban khmih bniah ha ka ban pynleit jingmut ïa kaei kaba dei ban leh, haei kaba dei ban leh bad wad haei ka jingeh ka don,” u la ong.
Haba kdew ba ka Sorkar ka wad ïa ki lad ki lynti, u la ong ba u sngewthuh bha ïa ka jingkhraw bad jingkitkhlieh na bynta ki nonghikai.
Shuh shuh u la bynrap, “Nga don hangne ban shakri ïa ki nonghikai bad ka jingshakri kan ïai bteng. Ngi don hangne na bynta ka bha ka miat jong ki nonghikai bad ka sienjam ba la shim da ka Sorkar ka long na bynta ka jingbha.”
