New Delhi, Lber:
Ka Sorkar Delhi ka la pynlong ïa ka jingkhmih bniah ban ithuh ïa ka jinglah shisha ban treikam halor ka jingduna jong ka jingpynjaboh ïa ka lyer ha ka nongbah. Ka Indian Institute of Technology (IIT) Kanpur ka la lamkhmat ban pynlong ka jingkhmih bniah bad ka IIT-Delhi bad ka The Energy and Resources Institute (TERI) ha kaba kine ki la ïatreilang na ka bynta ban pynbiang ïa ki jingdonkam ha ka ban wad ïa ki jingshisha ki ban ïarap ban pynduna ïa ka jingjaboh jong ka lyer.
Ka sorkar Delhi ka la thmu ban buh ïa ka Lab na ka bynta ba khmih bniah ïa ka jingpynmih jaboh ha kaba yn pyntreikam bad buh haman kawei pa kawei ka distrik jong ka nongbah, la ong u Myntri ka tnat pla tyngka u Kailash Gahlot ha ka sngi Balang. Kum ka jingwanrah ïa ka mang tyngka jong ka Delhi na ka bynta u snem ka kheiñ ka diah jong u 2023-24 ha ïingdorbar, u la ong ba ka jingjaboh kaba long PM2.5 bad ka PM10 ha ka nongbah ka la kham duna da palat 30 per cent ha ki phra snem ba la leit.
“U Myntri Rangbah jong ka Delhi u Arvind Kejriwal u la don jingthmu ban pyntreikam thymmai ha kaba ïadei bad ka jingkhmih bniah halor ka jingjaboh lyngba ka jingshim jingkheiñ jong ki Lab ban sa buh haman ki distrik,” la ong u Gahlot.
Ka sorkar Delhi ka la pynlong ïa ka jingkhmih bniah ban lap ïa ka jingshisha halor ka jingjaboh jong ka lyer ha ka nongbah. Nalor ka Indian Institute of Technology (IIT) Kanpur kaba la lamkhmat ïa ka jingkhmih bniah ha ryngkat ka IIT-Delhi bad ka The Energy and Resources Institute (TERI) ka Delhi Pollution Control Committee (DPCC) ka la long ka pdeng na ka bynta ban pyntyllun ïa ki jngpyntreikam.
Ka sorkar ka la dep ban thung hashwa ïa 7 ngut ki dkhot jong ka kynhun treikam kynthup ki heh jong ka Delhi Pollution Control Committee (DPCC) ki ban lah ban tehlakam bad ban leh ei ei ha kaba ïadei bad ka jingpynmih jaboh na ki karkhana kiba don ha ka nongbah.
U Myntri jong ka tnat Environment ha Delhi, u Gopal Rai u la ong ba katei ka kynhun ïa kaba la tip kum ka Task Force ka la shah pyntreikam ha katei ka bynta bad ka la dep ban jurip bniah ïa palat 1,200 tylli ki jaka. “Haduh mynta ki la don kumba 1280 tylli ki karkhana ïa kiba la dep ban jurip bniah kum shi bynta jong ka jingpyntreikam jong ka kynhun DPCC, ïa kaba la sdang kum shi bynta jong ka Summer Action Plan. Ka kynhun DPCC ka la pyntreikam ïa 7 ngut ki dkhot jong ka kynhun pyntreikam na ka bynta ban lah ban pynïaid shakhmat ïa ka jingthmu bad ka jingtehlakam ïa ka jingpynmih jaboh jong ki karkhana. Shuh shuh la ong ba baroh 1607 tylli ki karkhana ba la pynrung kyrteng ha Delhi ki la shah pynkylla sha ka PNG,” u la bynrap.
Katei ka jingthung ïa katei ka kynhun ka long shi bynta jong ka jingpyntreikam ka sorkar jylla ïa Summer Action Plan. U Myntri u la ong ba katei ka kynhun kan sa lah ban tehlakam bad ban khmih bniah halor ki jaboh ba la pynmih na ki karkhana ha baroh 24 kynta ha kaba la ju shem ba kiba bun ki jaboh na kine ki karkhana la ju pyntuid sha ki wah, ki nala, ki jaka rep bad sha kiwei pat ki jaka ba marjan bad kine ki jaka pyntreikam.
