Shillong, Lber 26:
Da ki hajar ngut ki paidbah kiba dei ki riewlum ki la ïalum ha madan Veterinary kaba don ha Khanapara ha ka Sngi U Blei ban pynpaw ïa ka jingdawa ban pynduh noh ïa ka jinglong ‘Scheduled Tribe’ jong kito ki riewlum ha Assam kiba la kylla niam.
Ïa kane ka jingïalang la pynlong da ka Janajati Dharm Sanskriti Suraksa Manch (JDSSM) (Assam) kaba dei ka kynhun kaba don jingïadei bad ka Rashtriya Swayamsevak Sangh (RSS).
Katkum u kyrwoh khubor ba la pyllait da u Binud Kumbang Co-Convener & Working President, JDSSM, Assam, la ong ba kumba 55,000 ngut ki briew na ki 30 tylli ki distrik ha Assam ki la wan sha katei ka jingïalang ha Khanapara. Ha la ka riam tynrai bad ka jingrah ïa ki jingtem jingput tynrai, u Kumbang u la ong ba la pyndep ïa ka niam ka rukom jong ki riewlum da ki briew na ka kynhun Boro, Karbi, Tina, Dimasa, Rabha bad Mising. Ha kane ka sngi, ka la don ruh ka jingpyni ïa ka put ka tem bad ka jingshad tynrai.
U Kumbang u la ong ba ka thong jong katei ka jingïakynduh jong ki riewlum ka long ban dawa na ka sorkar ba ka dei ban pynduh noh ïa ka jinglong riewlum lane ‘Scheduled Tribe’ jong kito ki riewlum ha Assam kiba la kyntait noh ïa ka jinglong tynrai, ka jingim tynrai, ka la-riti, ka jinglehniam leh rukom tynrai hadien ba ki la kylla niam.
Nalorkata, u la ong ba katei ka jingïalang ka la dawa ruh ban pynsangeh noh ïa ka jingpynkylla niam da ka lynti kaba long be-aiñ.
Ha kajuh ka por, u la ong ba ka jingdawa ka dei ban pynkylla noh ïa ka Article 342 jong ka Riti Synshar kaba dei shaphang ki riewlum (Scheduled Tribe) bad ban pynhap kyrdan bad ka Article 341 na ka bynta ki Scheduled Caste. U la ong ba ka don ka kyndon ba lada ki Scheduled Caste ki kylla niam, kin duh noh ïa ki bhah ki bynta ba kum ki Scheduled Caste ki ïoh kum ka jingai bhah ha ki kam ki jam jong ka sorkar bad kiwei.
Shuh shuh u Kumbang u la ong ba ka kynhun JDSSM kan sa phah da ka jingthoh sha ka President bad u Myntri Rangbahduh ka Ri India lyngba u Lat ka jylla Assam ban pynpaw ïa kitei ki jingdawa.
