Warsaw, Lber:
Ka Torun kaba dei kawei na ki shnong ha Poland sa shisien biang ka la ioh ia ka hok na ka bynta ban pynlong pat sa ia ka World Athletics Indoor Championships ha u snem 2026. Kumta ruh ka khubor ka iathuh ba katei ka shnong ka don ha ka thain Kuyavian-Pomeranian kaba la ioh teng ruh ban pynlong ia ka European Athletics Indoor Championships ha u 2021. Na ka liang u khliehduh ka World Athletics (WA) u Sebastian Coe u la kdew sha ki madan ialehkai ba paw ka ri Poland khamtam eh jong katei ka shnong kum ka madan ialehkai kaba bit ba biang eh na ka bynta ban pynlong ia katei ka lympung ha utei u snem.
U Coe u lah iathuh ruh ba ka ri Poland ka ju iai long ka ri kaba biang eh ha ka ban pynlong ia ki lympung ialehkai ka WA; ha kaba ka lah dep ban pynlong ruh ia ka World Athletics Relays ha Silesia ha u snem 2021 bad ia ka World Athletics Half Marathon Championships ha Gdynia ha u 2020. Kumta ha katei ka shnong ka ban sa long pynlong ia katei ka lympung ialehkai jong ka WA ha u snem 2026, u khlur ialehkai Pole Vault ka ri Sweden uba long ruh u lahduh ha ka Olympic bad ha ka pyrthei u Armand Duplantis; u la lah ban thaw ia ka rekod ba nyng-kongeh ha ka pyrthei ha kawei na ki lympung ialehkai ba lah long ha Torun lai snem mynshuwa kata ka Copernicus Cup.
Ka khubor ka iathuh ruh ba ka nong Antalya jong ka ri Turkey ka lah pynkhreh mynta shaid-shaid na ka bynta ban pynlong ia ka World Athletics Race Walking Team Championships 2024 bad na ka liang jong u Coe u iathuh ba ka ri Turkey dang shen eh ka dang shu dep ban pynlong ia ka European Athletics Indoor Championships ha Istanbul dang ha ki khyndiat sngi ba la lah mynta u bnai; wat la katei ka ri ka don hapdeng ki jingeh bad ka jingkynduh mawsiang ka jong ka na ka daw jong ka jingshah lynshop kynsan ha u Jumai uba jur. Kumta kan long ruh ka sien kaba ar ba katei ka r ikan pynlong ia ka World Athletics Series, hadien ba nyngkongeh ka lah dep ban pynlong ia ka World Athletics Indoor Championships ha u snem 2012 ha Istanbul.
