Shillong, Lber 26:
Ka Sorkar MDA-II kam pat don jingthmu ban pyntreikam ïa ka kynja khajna ba la tip kum ka ‘Green Tax’, ka rukom oh khajna ïa ki kali kiba jur ka jingpynjaboh ïa ka lyer da ka tdem kali, kynthup ïa ki kali kiba la rim kiba la ïaid palat 10 snem haduh 15 snem.
Ka ‘Green tax’ lane ka khajna kaba tip ruh kum ka khajna ban ïada mariang, ka dei kaba ju oh na ki kali kiba la rim bad kiba jur ka jingpynmih tdem.
Ki kali ha Meghalaya ki leh mon ba synjor ka jingpyntreikam ïa ka aiñ, bad da ki hajar tylli ki kali kiba ïaid ha surok ki pynmih tdem ïong man ka sngi.
Haba buh jingkylli halor kane ka mat ïa u Myntri Rangbah, u Conrad K Sangma ha ka sngi ba wanrah ïa ka mang tyngka jong ka Jylla ha Ïingdorbar Thawaiñ, la ka Sorkar Jylla kan leh kum ha kiwei ki ri bad kiwei ki Jylla ka India ban wanrah ïa ka ‘Green Tax’, u la ong ba kane ka kynja khajna ka dei kaba biang, khamtam ha ki ri bad ki Jylla kiba la kham kiew ka ïoh ka kot bad ka rukom im jong ki briew.
U la ong ba lada phai sha kane ka Jylla, ki paidbah ki dang duna ka ïoh ka kot bad bun ki nongshong shnong ki pyndonkam ïa ki kali kiba la ïaid la bun snem la ka dei ki kali kamai ne kali shimet.
U la ong ba kaba donkam ka long ban pynbiang ïa ki kali khnang ba kan nym jur eh ka jingpynmih tdem.
“Ka jingong ban pyntreikam ïa ka Green Tax lehse kan dei kaba biang, tangba kane ka dei ka mat kaba dang hap ïatai, ym ban pyntreikam noh,” la ong u Conrad.
U la ong ba ki don ki nongshong shnong kiba kot bor, kiba la nang pyndonkam sa da ki kali kiba duna ka jingktah ïa ka mariang kum ka kali ilektrik, hynrei kiba bun ki nongshong shnong ki dang bteng hi ban pyndonkam ïa ki kali kiba la ïaid ha surok la kham bun snem.
Kum ban pynkynmaw ka Sorkar Pdeng lyngba ka tnat Road Transport and Highways ka la mynjur naduh u Kyllalyngkot, 2021 ban pyntreikam ïa ka ‘Green Tax’.
Ka Sorkar Pdeng ka la phah sha ki Sorkar Jylla na ka bynta ka jingïasyllok bad twad jingmut lang hashwa ban pynmih ïa ka jingpynbna ban pyntreikam ïa ka ‘Green Tax’.
Katkum ka jingtyrwa kaba la buh lypa da ka Sorkar Pdeng, la ong ba lada pyntreikam ïa ka Green Tax, ki kali kamai kiba la ïaid palat 8 snem kin hap siew ïa ka road tax kaba long 10% haduh 25% ha ka por ba leit pan thymmai ïa ka syrnod kaba pynbit pynbiang ïa ka kali (fitness certificate). Katba ka Green Tax kan treikam ïa ki kali shimet ha ka por ba ki leit pynthymmai ïa ka syrnod pynrung kyrteng (Registration Certification) hadien 15 snem.
Ïa ki kali paidbah kum ki bos la tyrwa ba kham duna ka khajna (green tax), hynrei ka Green tax kan kham heh (50% na ka Road Tax) ïa ki kali kiba don ha ki nongbah kiba jur palat ka jingjaboh jong ka lyer.
